Ka qenë Elseid Hysaj ai që ka fituar derbin e shqiptarëve mes Napolit dhe Lacios. Hysaj përballë Strakoshës për një vend në Ligën e Kampionëve.
Napoli fitoi me një rezultat 3-0 në shtëpinë e lacialëve. Në “Olimpiko”, sfida që uli siparin e javës së 31-të të kampionatit italian u vendos nga goli i Kajehonit në pjesën e parë dhe dopieta e Insinjes në të dytën.
Sulmuesi spanjoll zhbllokoi rezultatin në minutën e 25-të pas një pasimi të kapitenit Hamshik, duke mposhtur Strakoshën që nuk mundi ta arrinte topin.
Gjashtë minuta pas pushimit, Insinje thelloi epërsinë e miqve duke marrë më të mirën nga një pasim i Alanit. Një pjesë e mirë e përgjegjësisë bie mbi “gardianin” shqiptar, i cili u tregua i pasigurt në dalje.
Dy minuta pas kohës së rregullt ishte përsëri shtatshkurtri italian që vulosi suksesin e Napolit me një të djathtë të kalibruar që përfundoi në cepin e poshtëm të portës.
Falë kësaj fitoreje skuadra e Hysajt, i cili u ndëshkua me karton të verdhë katër minuta para fundit, forcon pozitat në vendin e tretë me 67 pikë, -4 nga Roma. Kurse lacialët mbeten në kuotën 60, një shkallë më poshtë në renditje.
