”Jam i mahnitur nga këmbëngulja e Blushit për të luajtur viktimën, s’po shkruan ndonjë libër ku mund të lëshojë vrerin”, i përvishet Biba

Regjistrimi i partisë ”Libra” është kthyer sërish në ”mollë sherri” mes Ben Blushit dhe kreut të KQZ-së, Denar Biba.

”Prej mëse dy muajsh, Komisioni Qëndror i Zgjedhjeve nuk i përgjigjet kërkesës sonë që LIBRA të konstatohet si parti me dy deputetë në parlament, në përputhje me Kodin Zgjedhor dhe Kushtetutën.”, denoncoi Blushi, duke shtuar se ”Kolegji Zgjedhor, pas padisë dhe argumenteve tona konstatoi që KQZ ka thyer ligjin dhe vendosi që brenda 10 ditësh KQZ duhet t’i përgjigjet LIBRAs.”.

Për Blushin e gjitha nuk është më çështje ligjore, as politike, por psikike.

”Nuk e di nëse KQZ do t’i bindet vendimit të Kolegjit por çudia është që LIBRA do të marrë pjesë në zgjedhje dhe nuk lejohet, PD nuk do të marrë pjesë dhe shtyhen afatet që të rregjistrohet. Nuk është më çështje ligjore, as politike por psiqike.”, përfundon deputeti.

Por nuk ka qëndruar indiferent Biba, duke theksuar se Blushi po bën rolin e viktimës dhe se partia e tij është regjistruar në KQZ.

”Jam i mahnitur nga këmbëngulja e Ben Blushit për të luajtur deri në fund rolin e viktimës së KQZ! Nuk e di a është zoti Blushi i vetëdijshëm se nuk po shkruan një libër ku mund t’i lëshojë frerin fantazisë së tij, por deklarata ku vetëm gënjen dhe fyen një institucion që nuk i ka asnjë borxh. Sot, i lartpërmenduri ka publikuar një status ku pretendon se ka fituar gjyqin me KQZ, e cila “nuk paska pranuar ta regjistrojë”!!!Ndërkohë, e vërteta është se partia e tij “Libra” është regjistruar e para në KQZ dhe kjo provohet lehtësisht nga dokumentacioni zyrtar.”, i përvishet Biba, Blushit.

Blushi ka kaluar disa shkallë deri në regjistrimin e partisë, ku iu desh të mblidhte mbi 10 mijë firma. Por nga një verifikim i shpejtë në KQZ te partitë politike të regjistruara ”LIBRA” është e para në listë. Nuk dihet nëse për të qëndruar në këtë listë do të duhet të përmbushësh edhe ndonjë kriter tjetër. (V.G/SHUPLAKA)