Deklaratë e fortë e imamit Ahmed Kalaja në mbrojtje të të krishterëve. Sot në ditën e Pashkës, imami ka qenë duke folur para besimtarëve mysliman në xhami, teksa ka dhënë edhe mesazhin e fortë se kushdo që prek kishat dhe të krishterët do të ketë punë me ta. ”Opinion” raporton mbi fjalën e mbajtur të imamit.
”Në historinë shqiptare ka pasur momente shumë interesante se si prifti me njerëzit e kishës kanë dalë në mbrojtje të xhamisë, kur ka pasur momente që dikush ka dashtë të shtijë fitilin e përçarjes në emër të fesë dhe besimit.
Ne jemi të gatshëm si myslimanë të përsërisim të njëjtën gjë nëse dikush dëshiron të kërcënojë katolikët, ortodoksët, të krishterët shqiptarë, të jemi ne mbrojtësit e parë dhe të jemi ne rrethi i parë, i cili e mbron kishën nga çdo lloj sulmi të mundshëm, që ndonjë njeri i cili është agjendë e dikujt, që nuk na intereson, tenton të prishë harmoninë apo tolerancën ndërfetare në këtë vend.
Ne si myslimanë jemi gati, jemi të gatshëm që nëse dikush do të bëjë tentativa të tilla të kalojë përpara mbi trupat tonë, të kalojë përpara mbi gjakun tonë, pastaj të arrijë aty ku do të arrijë.
Pa kaluar mbi trupat tonë dhe pa kaluar mbi gjakun tonë nuk mund ta arrijë një gjë të tillë, sepse atë që e kemi nuk duam ta humbim dhe nëse dikush është në shërbim të ndonjë axhende “X” apo “Y” do të na e prishë, ne do të jemi të parët ata të cilët do ta mbrojmë, qoftë edhe me jetët tona, sepse kështu na mëson kjo fe e mrekullueshme. Kjo është feja e Zotit, kjo është feja që na ka ardhur prej Zotit”, predikoi Imami.
Kalaja u përfshi ditë më parë në një video me futbollistët e Kombëtares, ku vinin në lojë priftërinjtë. Komuniteti Mysliman i bëri vetëm vërejtje imamit, i cili kërkoi falje.
Futbollistët e Kombëtares Andi Lila dhe Armando Sadiku së bashku me Imamin e Xhamisë së Kavajës Ahmed Kalaja, shfaqeshin duke treguar histori gazmore me priftërinj ortodoksë. Video krijoi probleme si në Shqipëri ashtu edhe në Greqi.
Ndaj Imamit Ahmed Kalaja, kryesia e Komunitetit Mysliman Shqiptar ka marrë masën “Paralajmërim për dëbim nga puna” me motivacionin për shkelje të harmonisë fetare. (V.G/SHUPLAKA)
