Në finalen e Ligës së Kampioneve nuk do ketë një derbi madrilen, pasi dy skuadrat spanjolle do përballen me njëra-tjetrën që në gjysmëfinalet e kompeticionit. Gjithsesi, kjo përzgjedhje duket se nuk ka kaluar pa polemika në median iberike dhe është e përditshmja prestigjioze “AS” që hedh dyshime. Ajo shkruan se ka mundësi që të ketë pasur gogla të nxehta, për të dalluar se cila ishte Atletiko, në mënyrë që të sfidohen me njëra-tjetrën dy ekipet madrilene.
Ishte ish-futbollisti Ian Rash ai që zgjodhi dhe në fakt pati një diferencn për mënyrën se si i tërhoqi. Herën e parë, kur përzgjodhi goglën që nxori emrin e Realit të Madridit, ai i përzjeu të gjitha. Por, herën e dytë, kur do përzgjidhte edhe kundërshtarin e merengesve, nuk bëri asnjë rrotullim të goglave, por të parën që kapi, e ngriti menjëherë. Kaq ka mjaftuar që “AS” të shkruajë: “A kemi të bëjmë me gogla të nxehta?! Pse Ian Rash e mori menjëherë atë gogël dhe nuk i përzjeu?! A ishte pikërisht ajo që kishte temperaturën më të lartë?!”.
Në fakt, ky nuk është rasti i parë që polemizohet mënyra e vendosjes së dueleve në raundet eliminuese. Edhe në të shkuarën është përfolur për të njëjtën skemë, ku disa prej goglave janë ose shumë të nxehta, ose shumë të ftohta dhe personi që duhet t’i përzgjedhë, duhet të marrë pikërisht ato, në mënyrë që të realizohen duelet e dëshiruara. Por, pavarësisht polemikave, deri tani nuk ka pasur asnjë akuzë që të jetë vërtetuar.
DUELI
Reali dhe Atletiko tashmë kanë një “llogari të hapur” në Champions, për shkak të dueleve të shpeshta. Skuadra e trajnerit Diego Simeone e ka parë veten të humbur dy herë në finale, në duele me të vërtetë dramatike. Këtë edicion, ata janë ekipi më tepër energjik i kompeticionit, duke vrapuar plot 1160 kilometra deri tani, më shumë se askush tjetër. Nga ana tjetër, Zinedin Zidan ka skuadrën që godet më tepër në portën kundërshtare, krahasuar me të gjithë ekipet e tjera pjesëmarrëse, pasi e ka bërë një gjë të tillë 75 herë deri tani.
Discussion about this post