Xhaçka në Korçë zbulon skemën e re të ndihmës ekonomike: Qëllimi ynë shkon përtej lëmoshës sociale!

Ministrja e Mirëqenies Sociale Olta Xhaçka ka qenë sot në qytetin e Korçës, ku ka prezantuar skemën e re të të përfitimit të ndihmës ekonomike.

Në panairin  “Ustai i Qytetit Tim”, të organizuar nga Dhoma Kombëtare e Zejtarëve, Xhaçka është shprehur se një rëndësi e veçantë do t’i kushtohet zejtarëve.

“Nëpërmjet reformave të qeverisë në favor të artizanatit, zejet kanë marrë rëndësinë e duhur dhe vetë artizanët kanë filluar të kuptojnë rëndësinë që ka profesioni i tyre, i trashëguar ndër breza. Qeveria shqiptare do ta rivitalizojë zejtarinë, në mënyrë që mundi i zejtarëve të jetë edhe pjesë e shitjes dhe marketingut”, u shpreh ministrja Xhaçka.

Ndër të tjera, ajo është shprehur se: “Qeveria është tërësisht e angazhuar të bëjmë gjithçka në fuqinë tonë për t’ju ndodhur pranë më të pamundurve të shoqërisë sonë. Këto 3 vjet e gjysmë kemi bërë reforma të rëndësishme si ajo e ndihmës ekonomike dhe synimi kryesor nuk është thjesht dhënia e një lëmoshe nga shteti. Qëllimi ynë shkon shumë përtej konceptit të lëmoshës sociale. Jo, reforma ka për qëllim ndihmën e familjeve më të varfra me angazhimin për t’i mbështetur ato hap pas hapi drejt fuqizimit social dhe ekonomik të tyre. Zyrat tona të punës, funksionojnë sot me shërbim shumë cilësor, dhe mbi të gjitha me oferta pune për gjithkënd që synon punë dhe një të ardhme më të mirë përtej mbijetesës së përditshme”, u shpreh ministrja Xhaçka.

Sakaq, ministrja ka shtuar se shteti merr përsipër falas të gjitha detyrimet e kualifikimeve, si dhe krijimin e kushteve të favorshme per mbrojtjen dhe zhvillimin e zejtarisë, ndërsa çertifikimi i zanateve do të bëjë të mundur që të njihen edhe në tregjet e huaja. (D.D/Shuplaka)