Motra e aktorit të njohur Bes Kallaku, Ana e cila është moderatore në “Scan Tv”, mbrëmjen e kaluar teksa ishte e ftuar në emisionin “Oktapod” të Turjan Hyskës, ka folur për marrëdhëniet e saj me kunatën e ardhshme, këngëtarja Xhensila Myrtezaj.
“Unë dhe Xhensila jemi pothuajse moshatare, me një diferencë shumë të vogël… Xheni është bërë pjesë e familjes sonë pothuajse prej 7-vjetësh. Fakti që kemi dhe të njëjtën moshë me njëra-tjetrën, na i ka bërë gjërat shumë më të lehta, flisnim shumë, komunikonim shumë…”, tregon Ana.
Për më tepër, Ana tregon se një një periudhë kohe ato edhe kanë bashkëjetuar nën të njëjtën çati dhe për këtë arsye nuk e konsideron si kunatë, por më shumë si shoqe.
“Jemi më shumë si shoqe, madje edhe përpara se unë të zhvendosesha në shtëpinë time, me familjen time, kemi jetuar bashkë dhe unë pothuajse jam rritur me Xhenin.”, vazhdon tregimin Ana, e cila vetëm gjatë këtyre ditëve u mësua se ishte motra e Besit dhe kjo bëri shumë bujë në media.
Ndër të tjera, Turi i bëri pyetjen tipike shqiptare: “A gatuan Xhensila?”, çka e ka revoltuar në një moment moderatoren.
“Po pse pyet a gatuan nusja?’, pyetja tipike e jona. Xhensila është shumë e dashur, shumë gojëëmbël, shumë e respektuar, ka bërë të lumtur vëllain tonë, na ka bërë të lumtur të gjithëve. Xhensila edhe gatuan, edhe bën punë shtëpie, edhe punon, edhe është shumë e famshme, si të mos e duash?”, shprehet ajo.
Besi dhe Xhensila kanë lajmëruar se dashurinë e tyre disa-vjeçare do ta kurorëzojnë së shpejti në martesë, por ende nuk kanë bërë të ditur ndonjë datë. Megjithatë me shumë gjasa do të ndodhë këtë verë. Turi e pyet Anën gjithashtu për të zbuluar datën e ditës së shumëpritur, megjithatë ajo nuk zbuloi asgjë duke e lënë surprizë. (D.D/Shuplaka)
