Një pistat kryesore që Policia dhe Prokuroria kanë për vrasjen e dyfishte të Sukthit mësohet se është e shkuara kriminale e Juxhin Dautajt, raporton TV Klan.
Hetuesit kanë marrë në pyetje dhjetëra persona nga të cilët edhe nga Vlora, qyteti i lindjes së Dautajt. Në vitin 2012 në Vlorë Dauti vrau mikun e tij Fatjon Bani. 27-vjeçari ka qenë person me precedentë në fushën e lëndëve narkotike në Itali dhe më pas në Shqipëri.
Sipas hetimeve të Prokurorisë viktima dhe autori kanë qenë fqinj në Vlorë dhe kanë patur marrëdhënie shoqërore.
Nga viti 2008 deri në vitin 2012 ata kanë qëndruar sëbashku në Itali.
Dautaj i ka patur borxh Fatjon Banit për shkak se ky i fundit i kishte gjetur një sasi prej 200 gramë kokaine dhe ai nuk i kishte dhënë paratë. Kjo është konfirmuar nga dëshmitarë të cilët kanë patur njohje me të dy. Ky borxh i cili nuk u kthye asnjëherë, për Prokurorinë ishte motiv i krimit.
Në mars të vitit 2012 viktima dhe autori kanë qenë të dy në qytetin e Vlorës. Juxhin Dautaj sipas hetimeve e ka ftuar mikun e tij që të shkonte ta takonte afër repartit zjarrfikës të qytetit në lagjen Pavarësia. Në këto, sipas Prokurorisë ai e ka qëlluar me 3 plumba duke plagosur rëndë Banin, i cili humbi jetën në spitalin e Vlorës disa orë më vonë.
Në dosje është administruar dhe dëshmia e disa punonjësve të zjarrfikëses të cilët kanë komunikuar me të plagosurin. Ai u ka thënë se e kishte ngrënë në besë shoku i tij duke përmendur emrin e Juxhin Dautajt.
Para 5-ditësh Dautaj dhe Dalipaj janë ekzekutuar në Sukth në makinën që po udhëtonin. Atentati u konsiderua mafioz dhe akoma nuk ka persona të lidhur direkt me vrasjen që janë kapur. Ndonëse hetimet fillimisht u duk sikur po fokusoheshin kryesisht tek Dalipaj për shkak të detyrës, tashmë Dautaj dhe e shkuara e tij mbetet pista më e fortë. (M.D/Shuplaka)
