Duke sjellë për anologji komunizmin në Ditën Botërore të Punëtorëve, kryedemokrati Basha e akuzoi Ramën për mashtrim me shifrat e tij të punësimit. Ai u bëri thirrje shqiptarëve që të mos lejojnë një tjetër regjim komunist.
Lulzim Basha renditi mashtrimin dhe propagandën si armë të kryeministrit.
“Çdo 1 maj bënin parade me lule, duke brohoritur për kushtet që nuk i kishim, për lirinë që nuk e kishim, për shëndetin që e kishim të fundit në Europë. Ndaj 1 maji nuk ka si të jetë festë. 1 maji është dita për të përkujtuar se deri kur mund të poshtërohet një popull, një nënë një baba.
Mbajeni mend ju që keni qenë të detyruar të parakalonit këtu, jeni më fat. Parakalimi i 1 majit, shfaqje e shëmtuar e një populli që festonte poshtërimin e vet. Një mëkat i përbashkët, jo i barabartë.
Kush e harron historinë, është i destinuar ta përsërisë. Sot është dita të shohim njëri-tjetrin t’i themi JO zgjedhës politike. Sepse nëse nuk jemi gati, jemi gati të pranojmë një diktaturë tjetër me në krye Edi Ramën, që dëshiron që pas 18 qershorit ta shuajë pluralizmin.
Ky bashkim i madh qytetar e ka bërë zgjedhjen e tij. Ftesa ime është të ngrihemi e të bashkohemi e t’i shporrim me forcën e bashkimit popullor. Mashtrimi dhe propaganda janë arma më e fuqishme e edi Ramës, veçori të atij regjimi. Mashtrime që mediat qeveritare të kapura e shumëfishojnë.
Sot shpallën mashtrimin e ditës së punës. Sipas tij, rrena më e bujshme, më e pamoralshme sepse njeriu që premtoi 300 mijë vende pune, ka 300 mijë të larguar. Ky është fakti. Fakti tjetër është i botuar nga Banka Botërore, nga mikesha e kryeministrit, e cila ka firmosur qindra miliona kredi, e cila shkruan në raport se në gjithë Ballkanin Perëndimor janë krijuar 300 mijë vende pune.
Vetë mikesha e tij konfirmon atë që e di fare mirë çdo shqiptar, që në Shqipëri ekonomia u shkatërrua. Ky është fakt, kjo është e vërtetë. Këtë 1 maj, ne kemi ndërtuar këtu sheshin e lirisë, sheshin e të vërtetës, ku do i themi ashtu siç janë.
Edi Rama me taksat e larta, me pasigurinë totale, e shkatërroi ekonominë shqiptare. Shqiptarët e dinë këtë. Ndërmarrjet e mëdha, investitorët e huaj, po shikojnë si të largohen sa më parë.
Para disa javësh, deklaruan rritjen e pagës minimale. Shqiptarët e dinë mirë që po nuk u rrit ekonomia nuk rriten pagat. Kam pyetur sa është paga e tyre reale kur paga minimale ishte 22 mijë. 15 mijë-16 mijë për 6 ditë në javë. Merrnin një pagë të padenjë për realitetin gjeografik europian.”, tha Basha.
(XH.A/SHUPLAKA)
Discussion about this post