Analisti Arjan Çani në emisionin “Studio e Hapur” është shprehur se mendon që Partia Demokratike do hyjë në zgjedhjet e 18 qershorit.
Çani tha se palët politike janë ende në procesin e komunikimit dhe se Partia Demokratike do hyjë në zgjedhje, por kjo do ketë risk politik pasi kryeopozitari Basha do marrë kritika të shumta për veprimet aktuale pas hyrjes sipas tij në procesin zgjedhor.
“Më intereson më shumë rezultati sesa procesi i ditës së sotme. Basha tha se nuk do ketë bojkot, pra çfarë do ketë? Mendoj se jemi në procesin e komunikimit. Mendoj se partia që Basha drejton do hyjë në zgjedhje, por nuk di datën e saktë. Do ketë risk kur të hyjë se do i turren duke i thënë se ti na turpërove me këtë që bëre. Qëllimi sot është që opozita ti japë një fotografi perëndimit. Sot në BE dhe SHBA ka një fotografi që thotë se Basha s’ka dhe aq faj se ndryshe pse do hynte Rama në negociata. Fotografia e Shqipërisë sot është ajo e krizës. Sot nuk del më njeri të thotë që është krizë e PD si më parë, por krizë politike”- tha Çani.
Pak kohë më parë, Çani ishte shprehur kur kishte ftuar Ilir Metën në Zonë e Lirë se ishte i bindur që pavarësisht mohimit të Metës, ai do të ngjitej në postin e kreut të shtetit. Mbetet për t’u parë nëse Çanit do t’i dalë edhe kësaj radhe parashikimi. (M.D/Shuplaka)
