Kreu i LIBRA-s Ben Blushi, është i pari që ka reaguar pas përfundimit të negociatave mes kryeministrit Edi Rama dhe kreut të opozitës Lulzim Basha në selinë e Presidencës, të cilat për të disatën herë rezultuan një dështim.
I ftuar në emisionin “Të Paekspozuarit” të gazetarit Ylli Rakipi, Blushi u shpreh se nuk habitet aspak për rezultatin e negociatave.
“Isha i bindur se sot nuk do të kishte marrëveshje, është njëlloj si të besosh se një peshk mund të ecë në tokë.
Kjo është një marrëveshje që nuk është për shqiptarët por për ambasadorët, për të thënë që ja ne po bëjmë përpjekje. Por të dy palët nuk duan marrëveshje.
Megjithatë do të them, është thënë që një herë katër zëvendës ministra, një herë katër ministra. Nuk ka rëndësi. Kjo është e gjitha e turpshme, këtu duhet të ishin diskutuar standartet zgjedhore, ndryshimi i mënyrës se si numërohen votat. Ka disa standarte që i bëjnë zgjedhjet më të mira.
Kjo është një tentativë marrëveshjeje për të bashkëqeverisur, kjo që ndodhi nuk garanton zgjedhjet.
Sot jemi më larg marrëveshjes se para një jave, Edi Rama dhe Lulzim Basha kanë krijuar një lloj kimie për të bashkëqeverisur më vonë, këto dy parti po dobësohen, tentativë e dështuar për të bashkëqeverisur që do të realizohet pas një viti.”, tha Blushi. (D.D/Shuplaka)
Discussion about this post