Pas vendimit të kryeministrit Edi Rama për t’u tërhequr nga zgjedhjet e 7 majit për bashkinë e Kavajës, Partia Demokratike si rrjedhojë e ka anuluar protestën e parashikuar në këtë qytet ditën e zgjedhjeve.
“Ora News” raporton se kryedemokrati Lulzim Basha ka vendosur të mbledhë nesër në një takim, krerët e degëve të PD-së. Kjo për të vendosur për mënyrën e organizimit të protestës që do zhvillohet në Tiranë javën e ardhshme. Takimi pritet të zhvillohet rreth orës 12:00.
Protestën e paralajmëroi vetë pak orë më parë, kreu i PD-së Lulzim Basha në çadrën e opozitës.
“Ultimatumet e Republikës së vjetër i refuzojmë, ose bashkojuni Republikës së Re, Republikës së Lirisë, zgjedhjeve të demokracisë së vërtetë, ose përballuni me marshimin më të madh të qytetarëve javën e ardhshme në bulevardin Dëshmorët e Kombit. Dhe pas kësaj në çdo shesh e në çdo rrugë të çdo qyteti e çdo fshati, ku vullneti i shqiptarëve për demokraci nuk sprapset kurrë. Zgjedhjet e lira dhe të ndershme para drogës dhe krimit, preferojmë dialog por vendosëm të marshojmë paqësisht drejt zgjidhjes, kjo është rruga e Republikës së Re, Shqipërisë në Europë.
Zoti e bekoftë Kavajën, zoti e bekoftë Shqipërinë, zoti i bekoftë shqiptarët, fitore.”, deklaroi Basha. (D.D/Shuplaka)
Discussion about this post