“Kush fitoi në Kavajë?”, si përgjigjen Elisa Spiropali, Albana Vokshi dhe Paskal Milo

Dy ditë më parë supozohej të ishin zhvilluar zgjedhjet për bashkinë e Kavajës, mirëpo pas tërheqjes së Kryeministrit Edi Rama, ato u anulluan.

Mbrëmjen e sotme, të ftuar në emisionin “Studio e Hapur” të gazetares Eni Vasili, Elisa Spiropali, Albana Vokshi dhe Paskal Milo debatuan me njëri-tjetrin për pyetjen se “kush fitoi në Kavajë”, pas vendimit për të mos patur zgjedhje.

“Nuk është as fitore as humbje, në një moment kur ka kërcënime dhe nuk ka garë, s’besoj se mund të flasim për fitore, po të flasësh për fitore do të thotë të jesh në rolin e humbësit ose të të pandjeshmit. Qytetarët nuk e konsiderojnë as humbje as fitore. Ka shumë mëkate dhe majtas dhe djathtas edhe unë dua ta them në përgjithësi, ne nuk mendojmë se trimëri është të përballesh apo bëhesh pjesë e një konflikti që mund të ketë pasoja të qytetarët. trimëria është forca e shëmbëllit, aty ku frikacakët bëjnë të mirin, trimat duhet të bëjnë të arsyeshmin dhe të mençurin.”, u shpreh zëdhënësja e Kryesisë së PS-së, Elisa Spiropali.

Mirëpo deputetja e PD-së Albana Vokshi, nuk është e këtij mendimi. ajo e konsideron si një fitore të Republikës së Re.

“Dua ta përgëzoj Elisën që sqaroi se është Dita e Europës 9 maji dhe jo ashtu siç bën kryeministri, dita e fitores. Data 8 maj është dita e fitores dhe data 9 e Europës. Tjetër gjë është injoranca dhe tjetër gjë është mosdija.

 Së dyti, mendoj se ka një fitues shumë të madh në Kavajë, që është populli i Kavajës që tregoi se nuk ulet, nuk nënshtrohet. Nuk e di nëse Elisa ka patur mundësi të shkojë në Kavajë dhe të shohë si është atfmosfera, Kavajën e kishin braktisur, pavarësisht presionit që ushtrohej nga banda, institucionet, administrata.

Presioni ishte i gjithanshëm, kështu që të them që kur grupi i deputetëve shkuan në Kavajë, panë se qytetarët ishin të nënshtruar, të frikësuar, në ditët e fundit kanë hapur edhe lokalet për të biseduar deputetët me ta, në ditën e fundit Rama u braktis edhe nga aleatët, asnjëri nuk mori mundimin të futet në këtë farsë, them farsë sepse njëri ishte krahu i djathë i Elvis Rroshit, tjetri ishte po ashtu i PS-PS-së.

Së treti, Rama u braktis edhe nga Kavajasit, Kavaja është djepi i demokracisë, Rama u tërhoq, ne treguam se zgjedhje farsë nuk ka dhe nuk do të ketë. Treguan se zgjedhje pa opozitën nuk mund të ketë, zgjedhje nën frymën e bandave nuk mund të ketë.”, deklaroi Vokshi.

Ndërkohë, kreu i Partisë Demokracia Sociale Paskal Milo, deklaroi se fitues ishte gjithë Shqipëria.

“Për mua fitoi Shqipëria, as PS as PD por Shqipëria, sepse për mendimin tim në shmang një ballafaqim që mund të sillte shqetësim të madh jo vetëm për Kavajën, por për gjithë Shqipërinë.”, ishin fjalët e Paskal Milos. (D.D/Shuplaka)