Pasditen e sotme, ministri i Punëve të Brendshme Fatmir Xhafaj ka zhvilluar një takim me të gjitha strukturat e Drejtorisë Vendore të Policisë Durrës.
Në takimin ku Xhafaj shoqërohej nga Drejtori i Policisë së Shtetit Haki Çako, ka kërkuar nga punonjësit e policisë që të rrisin angazhimin për të plotësuar detyrat specifike sipas sektorëve të caktuar.
Gjithashtu, ministri i Punëve të Brendshme kërkoi nga strukturat e policisë që të zhvillojnë një luftë të vazhdueshme e të pandërprerë për kontrollin, evidentimin, raportimin dhe goditjen e çdo rasti të kultivimit të bimëve narkotike.
Ministri nënvizoi rëndësinë kyçe që ka ruajtja e rendit dhe sigurisë publike gjatë fushatës zgjedhore dhe çdo aspekt që lidhet me procesin e zgjedhjeve parlamentare.
Ai vuri theksin në paanshmërinë që duhet të karakterizojë Policinë e Shtetit gjatë procesit zgjedhor, duke theksuar se nuk do të tolerohet përfshirja e strukturave të saj në fushata paraelektorale apo elektorale, të kujtdo force politike qofshin ato. Në rast se konstatohen implikime të tilla, masat që do të merren do të jenë ekstreme, deri në largimin nga detyra.
Ministri Xhafaj u ndal edhe në punën kundër kultivimit dhe trafikimit të drogës, një nga arsyet për të cilat është kritikuar mjaft ashpër paraardhësi i tij Saimir Tahiri.
Ministri u kujtoi efektivëve se do të përballen me përgjegjësi personale, në rast të implikimit të ndonjë punonjësi policie në këtë aktivitet të paligjshëm kriminal. (D.D/Shuplaka)
Discussion about this post