Kuvendi vendosi për rrëzimin e qeverisë së tij, Mustafa: Kjo qeveri ia vuri laurën krimit!

Pas vendimit të Kuvendit të Kosovës për të rrëzuar qeverinë e tij, kryeministri në largim Isa Mustafa, ka reaguar përmes një statusi në Facebook.

“Kjo qeveri ia vuri laurën krimit, korrupsionit dhe kapjes së shtetit. Kam qenë i vetëdijshëm se PDK dhe klientela e korruptuar nuk e përballon këtë. Kemi penguar degradimin e shtetit dhe do ta çlirojmë nga kthetrat e krimit!”, shkruan ai.

Pak përpara se 78 deputetë të votonin pro mocionit të besimit për të rrëzuar kështu Qeverinë e Kosovës, kryeministri Isa Mustafa ka dalë përpara tyre ku ka mbajtur fjalimin që do të ishte i fundit për të si kryetar qeverie.

Duke u shprehur se nuk kishte diçka në veçanti për të thënë, ai u shpreh se vendimi i parlamentit do të ishte një “vendim meritor”. Duke shmangur komentet se kush-kujt iu bashkangjit, për të mos i komentuar, ai vlerësoi faktin që në seancën e sotme plenare për herë të parë shumica ishte në sallë dhe jo jashtë saj.

“Nuk kam diçka të them në veçanti, si shtet i ri duhet gjithmonë t`i nënshtrohemi qytetarëve dhe vullnetit të Parlamentit, ashtu si vendos Parlamenti, do jetë vendim meritor. Nuk dëshiroj fare të komentoj se kush-kujt iu bashkangjit, të kujt janë iniciativat, edhe pa votuar iu falënderoj për bashkëpunimin që e kemi pas dhe vlerësoj se ky Parlament meriton të ketë njerëz që i çojnë proceset përpara, e shoh se për herë të parë shumica janë në sallë e jo jashtë Kuvendit. Iu uroj shëndet dhe uroj që të vendosni sipas bindjes tuaj.”, u shpreh Mustafa. (D.D/Shuplaka)