Presidenti i ardhshëm i Republikës së Shqipërisë, Ilir Meta, i ftuar në emisionin “Top story” të gazetarit Sokol Balla, ka rrëfyer një histori të vitit 1992, një bisedë që ka bërë me Spiro Deden.
Meta tregon se ai e ka bindur që të qëndrojë në Shqipëri, në një kohë kur ai vetëm donte të ikte. Porosia që i ka dhënë Dede, Meta thotë që i kujtohet herëpashere.
“Në korrik të 92, ps fitoi zgjedhjet lokale. Unë nuk kam dashur të bëhem deputet në ’92. Nuk kisha bërë ndonjë gjë të rëndësishme, kisha nxjerrë dy drejtues policie të pafajshëm, që rrinin asokohe me doktorin.
Isha në këto dilemat atëhere, doja të ikja jashtë por isha këtu. Unë u nderova në FRESSH. Me Spiro Deden, kemi qenë një natë para kafe Europës. I thosha që dua të iki dhe më thotë zoti Spiro; të të bëj një pyetje, do të bësh politikan apo pedagog?
I thashë unë që të bëj shkollën të bëhem njëherë pedagog, edhe në politikë, por pedagog e kam prioritet.
Në rregull, më thotë, por nëse ikën jashtë do të humbasësh gjërat që do të mësosh këtu në politikë. Gjithmonë në gjithë këtë histori më rikujtohet vazhdimisht kjo porosi e Spiro Dedes dhe mendoj që ka qenë një porosi e drejtë.
Ka qenë një politikë shumë e vështirë, mizore, e pabesë dhe nëse jam këtu ku jam mendoj se kjo është rezultat i asaj që unë jam përpjekur të kem gjithmonë qëllime të mira pavarësisht nga gabimet që kam bërë. Nuk mund të thotë asnjë në Shqipëri që unë i kam gënjyer dhe gjithmonë kam qenë mirënjohës dhe kam parë përpara.
Po nuk pe përpara në politikë mbetesh peng i së kaluarës, i inatave, hakmarrjeve dhe sherreve. Mua më vjen keq që ka politikanë që kanë shumë përgjegjësi dhe nuk arrijnë të ngrihen në nivelin e atyre përgjegjësive dhe shkëputen nga njerëzit. Të qenurit me këmbë në tokë për mua ka qenë një sukses në politikë.”, shprehet Meta. (D.D/Shuplaka)
Discussion about this post