Idrizi: ”Mamuthët e mëdhenj” kanë marrë peng politikën, qytetarëve duhet t’iu jepet mundësia njëherë në disa vite

Jo pak herë përfaqësues të PDIU-së janë shprehur kundër sistemit elektoral dhe mënyrën sesi menaxhohet procesi zgjedhor në vendin tonë.

Sot kreu i kësaj Partie Shpëtim Idrizi ka sulmuar dy partitë e mëdha se e kanë marrë peng sistemin zgjedhor. Në një takim me strukturat e njësisë 1 dhe 2, në Tiranë, Idrizi tha se partia që ai drejton futet e cunguar në këto zgjedhje.

‘’Ne sot kemi një kastë politike e cila është e mbërthyer në disa duar Kjo është arsyeja që ne hymë në këto zgjedhje të cunguar. Me një formulë ku dy “mamuthët e mëdhenj” të politikës, jo vetëm e kanë kapur peng sistemin zgjedhor, por e mbajnë peng me konfliktualitet.

Unë jam shpresëplotë që edhe në ditët në vazhdim, gjysma e spektrit politik shqiptarë do ta gjejë mundësinë për të hyrë në këto zgjedhje. Unë bëj thirrje vazhdimisht për kompromis, për zgjidhje, sepse nuk garojnë thjeshtë partitë politike, por është mundësia e qytetarëve shqiptarë që një herë në 4 vjet, të zgjedhin’’, është shprehur Idrizi.

Ndërkohë deputetja Mesila Doda tha se PDIU ka verifikuar listën e kandidatëve për deputetë, në mënyrë që asnjë prej tyre të mos ketë lidhje me të shkuarën komuniste. (E.K/SHUPLAKA)