A do të shkarkojë Trump edhe Sekretarin e Shtetit pas kreut të FBI-së?

Sekretari amerikan i Shtetit Rex Tillerson thotë se nuk është i shqetësuar pasi presidenti shkarkoi drejtorin e FBI-së James Comey.

“Kam një marrëdhënie shumë të mirë me presidentin. Unë i kuptoj objektivat e presidentit. Kur kam diçka të paqartë, e diskutoj me të. Unë jam i përkushtuar për të ndihmuar presidentin që të përmbushë objektivat e tij, që të arrijë sukses. Unë e kam të qartë se duhet të punoj për të ruajtur besimin që ka presidenti tek unë, si dhe veprimet që duhet të bëj për të përmbushur detyrën në Departamentin e Shtetit në mënyrë konsistente me drejtimin që ai synon për vendin,” -tha sekretari i shtetit në një intervistë për emisionin “Meet the Press” të rrjetit NBC

Sekretari Tillerson u shpreh po ashtu se rrëmuja politike që pasoi shkarkimin e drejtorit të FBI-së, James Comey nuk ndikon tek marrëdhënia e tij me presidentin.

“Unë nuk do të bëj kurrë kompromis me vlerat e mia. Kjo është e vetmja linjë që ndjek. Vlerat e mia përputhen me vlerat e vendit tim,” -zoti Tillerson. (M.D/Shuplaka)