Kryetari i Kuvendit të Shqipërisë, Ilir Meta, priti së fundmi në takim delegacionin e Asamblesë Parlamentare të Organizatës për Siguri dhe Bashkëpunim në Evropë (OSBE) të përbërë prej z. Roberto Battelli, Zv. President i AP OSBE, z. Andreas Nothelle, Përfaqësues i Veçantë i AP OSBE dhe z. Bernd Borchardt, Ambasador i OSBE në Tiranë.
Në këtë takim, ai shprehu mirënjohjen për bashkëpunimin e deritanishëm mes Kuvendit të Shqipërisë dhe Asamblesë Parlamentare të OSBE-së dhe në kuadër të bisedimit mbi situatën politike në vend nënvizoi se Shqipëria ka nevojë për një marrëveshje të përgjegjshme mes palëve e cila bazohet mbi parimin e gjithëpërfshirjes dhe dialogut konstruktiv politik.
“Askush nuk duhet të luajë me fatin e qytetarëve shqiptarë, ndaj sot më shumë se kurrë nevojitet pjekuri, përgjegjshmëri kombëtare dhe vullnet për të gjetur kompromisin e munguar me qëllim garantimin e zgjedhjeve të lira e të ndershme”, – u shpreh Meta.
(XH.A/SHUPLAKA)
