Nënkryetari i LSI-së Luan Rama është shprehur se distancohet ndaj qëndrimeve të Kryeministrit Rama ndaj Kryetares së Bashkisë së Shkodrës Voltana Ademi ditën e sotme.
Në “Debat në Channel One” Rama theksoi se një gjuhë e tillë nuk përshtatet me filozofinë e LSI-së ku fyerje të kësaj natyre nuk duhet të jenë në sjelljen dhe në qëndrimet politike dhe publike të cilit do njeriu që merret me politikë.
“Qasja jonë është krejt e ndryshme dhe parimore për vlerën dhe angazhimit egrave dhe vajzave, jo vetëm në politikë, por në të gjithë dimensionin social dhe intelektual të jetës së vendit. Unë nuk mund ta pranoj dhe distancohem nga qëndrimi fyes që u mbajt ndaj kryetares së Bashkisë së Shkodrës, e cila sipas asaj që tha sot kryeministri, paska qenë e pa denjë për ta marrë edhe si magaziniere.
E para profesioni i magazinieres është një punë shumë e nderuar dhe ne nuk kemi arsye pse ta trajtojmë me nervozizëm dhe në mënyrë fyese këtë profesion.
E dyta ajo është një zonjë që e ka zgjedhur shumica e qytetarëve të Shkodrës. Ajo është kryetare bashkie e njërës prej bashkie më të madhe të vendit. Ka qenë deputete e Kuvendit të Shqipërisë dhe për pasojë qasja të kësaj natyre, stigmatizime të kësaj natyre, fyerje të kësaj natyre, nuk janë dhe nuk duhet të jenë në sjelljen dhe në qëndrimet politike dhe publike të cilitdo njeriu që merret me politikë dhe jo më të një njeriu përfaqësues”,– u shpreh Rama.
Voltana Ademi dhe Rama u përfshinë sot në një debat të ashpër për çadrën e ngritur në vendin ku Rama do takonte të rinjtë votues për herë të parë.
(M.D/Shuplaka)
Discussion about this post