Gjykata e Tiranës ka zbardhuar arsyetimin e vendimit që shfajësoi nga akuza e “vrasjes me paramendim” ish-deputetin e Partisë Socialiste Mark Frroku.
Gjykata analizoi në detaje të gjitha provat e marra gjatë shqyrtimit, duke dalë në përfundimin se i pandehuri nuk ka lidhje me krimin e ndodhur në vitin 1999 në Bruksel, ku u vra emigranti shqiptar Aleksandër Kurti.
Mark Frroku nuk shpëtoi me tre akuzat e tjera, atë të “pastrimit të parave”, “fshehjes së pasurisë” dhe “ndërtimit të paligjshëm”. Ai u deklarua i fajshëm për tri akuzat e fundit dhe u dënua me 7 vjet e 6 muaj heqje lirie.
Si erdhi pafajësia
Trupi gjykues vërente mangësi të theksuara në hetimin e kryer për ngjarjen e vitit 1999 në Belgjikë nga autoritetet belge të drejtësisë në analizë të provave të shqyrtuara në proces, atyre shkresore dhe atyre me dëshmitar. Sipas gjykatës, nuk ka një akt që të provojë si është administruar nga policia një thikë, me të cilën dyshohet të jetë kryer vrasja.
Po ashtu, nuk është vërtetuar nëse kjo është arma e krimit, nuk u është bërë ekzaminim njollave të gjakut të gjetura në vendin e ngjarjes. Duke iu referuar dëshmive të administruara në proces, gjykata vlerëson se ka pasur një përleshje mes viktimës dhe autorit, por nuk qartësohet se kush e ka nisur përleshjen, apo kush e ka pasur thikën, raporton Panorama.
Sipas gjykatës, nuk provohet as pretendimi i Prokurorisë për motivin e vrasjes, atë të lidhjes së viktimës me një prostitutë shqiptare në Bruksel. Trupi gjykues sqaron edhe mosshqyrtimin e dëshmive të dhëna në shtetin belg nga dëshmitarë anonimë të paidentifikuar.
“Nuk është vërtetuar dhe provuar ‘jashtë çdo dyshimi të arsyeshëm’ se i pandehuri Mark Frroku e ka kryer veprën penale për të cilën akuzohet, pasi nuk u provua përfshirja e tij në ngjarje, rolin që ai ka pasur në të, motivin e tij për të qenë pjesë e ngjarjes, por nuk u provua as mekanizmi, dinamika e ngjarjes, madje as vërtetuar shkencërisht arma e krimit”,- theksonte gjykata.
(M.D/Shuplaka)
Discussion about this post