Marrëveshja e orëve të vona mes kryeministrit Edi Rama dhe kryedemokratit Lulzim Basha, është komentuar këtë mëngjes edhe nga deputetja e LSI-së e njëherazi Zonja e Parë e ardhshme, Monika Kryemadhi.
E ftuar në emisionin e mëngjesit në “TCH”, ajo ka komentuar marrëveshjen duke iu uruar shqiptarëve begati, qetësi dhe stabilitet.
“Mirëmëngjes, mirë se iu gjeta me këtë ditë të bukur, me diell, me marrëveshje më në fund, që shpëtuam, që do ta zgjidhim këtë histori. Uroj që kjo t’u japë më shumë begati, qetësi dhe stabilitet shqiptarëve.
Më tej gjatë emisionit, si zv/kryetare e LSI-së, ajo ftoi shqiptarët t’u bashkohen më 16 korrik, duke lënë të kuptohet se zgjedhjet do mbahen më 16 korrik: “Ju ftoj dhe ju të bashkoheni me ne, më 16 korrik, se në këtë datë u lanë apo jo?!”
E pyetur konkretisht për marrëveshjen, ku është folur se një pikë e marrëveshjes ka qenë edhe posti i presidentit, ajo shprehet se nuk beson diçka të tillë, duke e shoqëruar me batuta për Metën.
“Nuk e besoj. O Zot i madh, mos, pafsh Zotin se kush e duron dhe një herë tek partia. Unë jam shumë e lumtur se më hapet rruga mua tani. Deri tani ishte Ilir Meta dhe thonin “Nga një për shtëpi, nuk lejohet.” Fliste ai, andej këtej, “tTi s’ke për të folur, s’ke për të bërë”. Tani që iku ai, unë mund të kem ndonjë shans për ta zhvilluar karrierën politike.”, është shprehur ajo plot humor.
Ky reagim i saj këtë mëngjes vjen pas takimit rreth tri orë që kryeministri Edi Rama zhvilloi me kryedemokratin Lulzim Basha, pas takimit të partive parlamentare. Takimi kokë më kokë në Kryesinë e Kuvendit përfundoi pas mesnate dhe u shoqërua me shtrëngime duarsh. Deri tani, nuk ka ende asnjë detaj mbi marrëveshjen e arritur për shkak të dakordësisë së arritur për të mos zbuluar gjë momentalisht.
(XH.A/SHUPLAKA)
Discussion about this post