Shkëlzen Maliqi ka deklaruar se në Kosovë zgjedhjet do t’i fitojë koalicioni PDK, AAK dhe Nisma. Ai është shprehur se duke nisur nga zgjedhjet e viti 2014 dhe tendencat e elektoratit koalicioni PDK,AAK dhe Nisma do të dalin fitues.
“Nëse nisemi nga dy fakte relativisht përcaktuese, e para nga vota e vitit 2014 dhe tendencat e njohura të sjelljes së elektoratit ku deri më sot nuk kanë ardh në shprehje krizat dhe çarjet e mëdha, mund të parashikohet se gjasat për fitore janë më të mëdha të koalicionit PDK-AAK-NISMA+ 10 subjektet tjera që në zgjedhjet paraprake kanë pas rreth 300 mijë votues, kurse koalicioni LDK-AKR-Alternativa ka pasur rreth 80 mijë më pak”, tha ai për Gazeta Blic.
Për Vetëvendosjen Maliqi është shprehur se do kishte shanse më të madhe sikur të futej në koalicion me LDK-në dhe AKR-në.
“Lëvizja Vetëvendosje ka qenë edhe më pak e përkrahur, dhe vetëm nëse do të lidhej në një formacion me LDK-AKR etj, do të mund t`i afrohej ose konkurronte seriozisht për fitore”, ka deklaruar ai.
Ai konsideron se pavarësisht pse PDK-AAK-NISMA, është favorite për fitore, ajo do të ballafaqohet me disa probleme gjatë krijimit të qeverisë.
“Pra, sipas meje favorit është koalicioni i partive të krahut të luftës. Por, kjo nuk do të thotë se sërish nuk do të ketë probleme me krijimin e qeverisë nëse kjo fitore nuk do të jetë me numër deputetësh shumice… Psh nëse koalicioni fitues merr p.sh. 45 deri 50 mandate, e koalicioni i dyte rreth 30, VV rreth 20, sërish do, të krijohet një situatë bllokade relative ku VV-ja do të mund të bëhet force përcaktuese, king-maker… por me kushtëzime që do të janë të papranueshme për dy koalicionet… Pastaj, ndoshta dalja nga bllokada do të jetë sërish koalicioni i madh me një formule mbase pak me ndryshe… megjithatë, uroj që kjo të mos ndodh dhe të kemi një fitues deblokues të aftë që ti kryej punët e mbetura”, ka thënë Maliqi. (B.H/Shuplaka)
