Ndarja nga jeta e Kadelit, Kokëdhima: Ka arritur gjithçka me shumë sakrifica

Kreu i Lëvizjes ZGJIDHJA Koço Kokëdhima, ka reaguar lidhur me ndarjen nga jeta të deputetit të LSI-së, Gjovalin Kadeli.

Kokëdhima e kujton Kadelin si një njeri që ka arritur gjithçka me shumë sakrifica.

“Lamtumirë i dashur Gjovalin!

Gjovalin Kadeli nuk është më midis nesh. Për gati tri vite ishim kolegë në Komisionin Parlamentar të Ekonomisë dhe në seancat plenare të Kuvendit.

Ruaj respekt të veçantë nga njohja që pata me të. Një djalë që e kishte arritur gjithçka me forcat e veta dhe me shumë sakrifica.

 Ai do të mbetet i tillë në kujtesën time dhe të të gjithë atyre që janë të tronditur nga kjo humbje e rëndë dhe e parakohshme. 
Të qoftë i lehtë dheu, i dashur mik!”, shkruan Kokëdhima.

Gjovalin Kadeli mësohet se ka humbur jetën në Itali teksa po kurohej për një sëmundje që e mundonte prej kohësh. (D.D/Shuplaka)