Emisioni Fiks Fare ka publikuar sot rastin e një 17-vjeçari, i cili i dha fund jetës me fostoksinë. Motra e të ndjerit ka rrëfyer ngjarjen e rëndë. Sipas saj, 17-vjeçari e ka blerë lëndën helmuese pranë konviktit të shkollës, në një farmaci bujqësore.
Motra e tij Myfarete Xhaferaj tregon se ka mësuar për të vëllain nga infermieria e spitalit.
“E mora në telefon si zakonisht, por m’u përgjigj infermierja, e cila më tha se vëllai im ishte shtruar në spitalin e Beratit. Kur mbërrita e gjeta në gjendje të rëndë. Nga stafi mjekësor mësova se kishte pirë fostoksinë. Helmin e kishte blerë në një farmaci e cila është shumë pranë konviktit të shkollës ku im vëlla ndiqte studimet. Sigurisht që ishte penduar për këtë veprim fatal dhe kërkonte nga mjekët që ta shpëtonin. Por, nuk ja doli.” rrëfen motra 17-vjeçarit.
Familja e 17-vjeçarit të ndjerë ka bërë kallëzim penal për farmacinë bujqësore, pasi pretendojnë se aty është blerë helmi nga ana e minorenit.
Emisioni iu drejtua farmacisë bujqësore së dyshuar nga familjarët e 17- vjeçarit dhe farmacisti ka rrëfyer se nuk ishte në dijeni nëse e kishte shitur tek minoreni substancën helmuese.
“Unë jam farmaci bujqësore jam i licencuar të tregtoj edhe barna me rrezikshmëri të lartë. Nuk e mbaj mend nëse i kam shitur fostoksinë këtij rasti. Edhe mund t’ia kem shitur, ndoshta dhe jo, kam deklaruar çfarë kisha për të thënë në prokurori”, shprehet ai.
(M.D/Shuplaka)
