Gazetari Sokol Shameti ka shkruar sot rreth aktivitetit në fushatë të kryeministrit Rama duke thënë se “duhet të jesh qorr që të mos shohësh programin e tij.
“A nuk e patë shpalosjen e programit për ekonominë gjatë drekës me kërnacka dhe byreçka tek familja korçare”,-shkruan Shameti në rrjetet sociale.
Postimi i Shametit:
SHPALOSJE E SHIJSHME
Të gjithë këta që akuzojnë Ramën se po bën fushatë pa shpalosur asnjë program qeverisës, janë më e pakta miopë. Si mund të mos e dallosh që shpalosja e programit po bëhet petë-petë dhe me shumë lezet, aty gjatë drekave me mish keci dhe salcë kosi nëpër shtëpitë e popullit?
Si mund të jesh kaq qorr sa të mos shohësh se kjo shpalosje po bëhet në mënyrë fare transparente përmes transmetimeve në kanalin ERTV? A nuk e patë shpalosjen e programit për ekonominë gjatë drekës me kërnacka dhe byreçka tek familja korçare?
Po shpalosjen e programit për bujqësinë, midis gjetheve të spinaqit të njomë dhe zogjve të fshatit në Fier? Po shpalosjen e programit për peshkimin gjatë gëlltitjes së midhjeve sote dhe barbunit në Durrës? Po shpalosjen e programit për politikën e jashtme sot gjatë kullufitjes së xaxiqit dhe paidhaqeve në Dropull?
Program për qeverisjen tuaj pra, ka. Ai deri tani ka qenë i palosur. Tani po shpaloset dhe po tundet si me qenë shami beqari dasmave. Ai madje po digjet e po bëhet tym fare, nga zijafeti në zijafet, nga dreka në drekë, nga banketi në banket, nga qoftet tek shishqebapi duke kaluar përmes japrakëve dhe tejpërtej pilafit. Ju qofshi që s’e shihni.
(M.D/Shuplaka)
Discussion about this post