Prokuroria e krimeve të rënda po verifikon si pronarë të mundshëm apo financues të kanabisit në tunelet e ish rezervave të shtetit në Përmet tre persona nga Tirana dhe një nga Tepelena.
Gjatë aksionit “Pagri 2017” në këtë zonë u gjet në ish-depot e shtetit një sasi prej 12 tonë kanabis. Nga dëshmitë e marra prej banorëve të zonës në fshatin ku u gjet kanabisi, por edhe referuar tabulateve telefonike të shtetasve të arrestuar, Prokuroria dyshon se tre sipërmarrës nga Tirana me aktivitet në pronësinë e lokaleve të ndryshme dhe pikave të basteve, mund të jenë financues të aktivitetit kriminal në Përmet.
Prokuroria për Krime të Rënda ka verifikuar se qeset dhe thasët e lëndës narkotike në Përmet kishin nga një shenjë dalluese, që mendohet se tregon edhe pronësinë e tyre.
Secila qese apo edhe thasët e mbushur me hashash, të cilët peshonin nga 5 deri 35 kilogramë kanabis, janë parë se kanë nga një vijë në formën e shenjës të vendosur në pjesën e jashtme të ambalazhit.
Shenja e vijës, e vendosur në qeset e thasët e mbushur me kanabis, ndryshon katër herë, sepse ka ngjyrë të kuqe, blu, jeshile dhe të bardhë në formën e shkronjës dhe vijëzimit.
Për këtë arsye, ka dyshime se lënda narkotike u përket 4 personave të ndryshëm, dy prej të cilëve mendohet se janë identifikuar plotësisht tashmë nga ana e Prokurorisë.
Dy prokurorët e Krimeve të Rënda po hetojnë këtë rast, ndërsa po verifikohen edhe veprimet e efektivave dhe zyrtarëve të Policisë së Gjirokastrës dhe Përmetit.
Ata dyshohet se nuk kanë bërë asnjë kontroll në godinën ku fshihej droga, e cila mendohet se është grumbulluar në një kohëzgjatje disamujore.
Ndërkohë magazinat në Pagri duket se kanë shërbyer për grumbullimin e kanabisit nga disa zona të Jugut të vendit dhe përgatitjen e saj për trafikim jashtë Shqipërisë. (S.SH/Shuplaka)
Discussion about this post