Të përfshirë nga festa dhe shumë kilometra larg fizikisht nga ndeshja e Kombëtares Shqiptare në Izrael, na kanë humbur shumë nga detajet.
Pamjet që vinë nga televizioni nuk mund t’i thonë të gjitha. Në raportimin e gazetarit Pano Xhixho nga Izraeli, shihen se gjërat nuk kanë qenë aq entuziaste sa duken.
Ajo që dihej edhe pa parë ndeshjen është se De Biazit i duhej patjetër një rezultat pozitiv, në të kundërt do të duhej të largohej nga Kombëtarja. Po pavarësisht kësaj ai është shfaqur mjaft i ftohtë edhe pas tre golave që djemtë kanë shënuar.
* Trajneri i Kombëtares, Xhani De Biazi e nis i ulur në stol ndeshjen e djeshme. Momenti i parë që çohet, ishte kundërsulmi i Odise Roshit. Aty ngrihet nga stoli rreth minutës së dhjetë.
* Roshi ishte emri më i lakuar nga De Biazi si në fazën sulmuese, edhe atë mbrojtëse, prandaj e ndryshoi disa herë pozicionin.
* Goli i parë ishte festë e moderuar e De Biazit që vetëm ka shtrënguar grushtet, ndërkohë që te goli i dytë i gjithë stoli ka shkuar te trajneri dhe e kanë takuar si për t’ia dedikuar trajnerit.
* Në minutën e 40-të, De Biazi i është drejtuar sërish Roshit duke i thënë: “Kështu nuk vazhdojmë më”. Roshi i përgjigjet: “Nuk mbushem dot me frymë”.
* Pjesa e dytë fillon me Lenjanin në nxehmje, por ndërrimi i parë është Andi Lila.
* Entuziazmi kap stolin dhe ndihmësit e De Biazit dalin për të dhënë indikacione. Trajneri italian kthehet dhe thotë me ton: “Këtu direktivat i jap unë!”.
* Protesta të shumta të stolit të kuqezinjve për një ndërhyrje ndaj Lilës që, sipas tyre, duhej ndëshkuar ashtu si u ndëshkua kavajasi.
* Goli i Memushajt ishte manual dhe stoli e ka festuar në mënyrën më të çmendur. De Biazi u ka treguar pjesëtarëve të stafit me gishtin tregues mendjen e tij duke i lënë të kuptonin se ishte zgjidhja e tij që Lila dhe Hysaj të ndryshonin pozicionin dhe pikërisht shkodrani jep asistin për Memushajn që shënon golin e tretë.
* Armando Sadiku nuk e përtyp mirë ndërrimin në sfidën e djeshme. I vetmi që nuk feston te goli i tretë i Shqipërisë.
* Minutat e fundit të De Biazit ishin shumë me emocione, sepse nuk donte kurrsesi të pësonte.
* I pari që hyri në dhomat e zhveshjes ishte pikërisht italiani pas përfundimit të takimit. (E.K/SHUPLAKA)
Discussion about this post