Gjatë konferencës për shtyp, ish-kryetari i Lëvizjes Socialiste për Integrim, Ilir Meta, u shpreh edhe në cilësinë e Kreut të Lartë të Shtetit, që pritet të jetë së afërmi.
Duke shprehur shqetësimin për manipulimin e procesit zgjedhor, gjë të cilën ai e përsëriti disa herë gjatë fjalës së tij, Meta theksoi se nuk do të tolerojë të vidhen votat, të cenohen zgjedhjet e përgjithshme parlamentare të 25 qershorit.
Në kuadër të kësaj, ai paralajmëroi se nuk do të dekretojë kryeministrin dhe as ministrat në rast se vihet dorë mbi votat. Meta u shpreh se si President i Republikës së Shqipërisë nuk do të lejojë që vendi të kthehet në depozitë të mbetjeve të rrezikshme të Europës apo në plantacion droge.
“Unë po paralajmëroj dhe po lajmëroj cilindo që mendon se mund të verë dorë mbi votën, se nuk do ketë dekret për kryeministër dhe as për ministra. Procesin e drejtë e vendos rinia e Shqipërisë. Nuk do të lejoj të kthehet Shqipëria në depozitë të mbetjeve të rrezikshme të Europës dhe më gjerë dhe plantacion droge.”, u shpreh Meta.
Në kuadër të një procesi të drejtë zgjedhor, Meta bëri me dije marrëveshjen e arritur me PDIU-në, ku ruajtja e votës është thelbi:
“Kjo nuk është aleancë e tyre kundër LSI apo PDIU, por kundër gjithë qytetarëve shqiptarë. LSI apo PDIU kanë komisionerë në gjithë Shqiptërinë, dhe mos t’i shkojë asnjërit të prekë një votë, kjo nuk është fjala e Lulzim Bashës por fjala e Ilir Metës. Këtë do t’ua bëj të qartë gjithë ndërkombëtarëve se ora që ndëshkon kartelin e drogës që frikëson qytetarët ka ardhur.”
(XH.A/SHUPLAKA)
Discussion about this post