Ankesa e LSI-së për hetimin e Elez Gjozës, zv/kryeministrja Mandija urdhër: Çështja të futet në rend dite në mbledhje e Task-Forcës

Zëvendëskryeministrja Ledina Mandija ka urdhëruar së fundmi që çështja mbi hetimin e Elez Gjozës të futet sa më parë për diskutim në rend dite në mbledhjen e ardhshme të Task-Forcës.

Kjo kërkesë e saj vjen pas ankesës së Lëvizjes Socialiste për Integrim drejtuar Mandijas në cilësinë e drejtueses së Task-Forces “Për monitorimin e veprimtarisë, sjelljes apo përdorimit të burimeve njerëzore, financiare dhe logjistike të administratës shtetërore, gjatë procesit zgjedhor për zgjedhjet në Kuvendin e Shqipërisë për vitin 2017” të krijuar me VKM nr. 473, datë 01.06.2017, se kallëzimi i bërë në organin e prokurorisë nga Policia e Shtetit në ngarkim të  Elez Gjoza është bërë pa kryer një vlerësim të thelluar të rrethanave të faktit.

Sipas LSI-së kjo bëhet për të cenuar figurën e Gjozës dhe me qëllim pengimin e fushatës zgjedhore të LSI-së.

Prej disa ditësh, Mandija i ka kërkuar informacion urgjent kreut të Policisë së Shtetit, Haki Çako për procedurën e ndjekur dhe veprimet e kryera nga Policia e Shtetit për verifikimin e rastit në fjalë dhe një kopje të kallëzimit bërë në Prokurori.

(XH.A/SHUPLAKA)