Ish-ministri i Drejtësisë Ylli Manjani, ka reaguar lidhur me zgjedhjen e gjykatësit Gjin Gjonit si relator i ankimimit të LSI-së, nga Kolegji Zgjedhor.
“Disa të huaj dhe vendas nuk po mësohen me shortin që i bie Gj.Gjonit! Fiksim u është bërë! Edhe në shortin e UEFA do ju dalë emri i Gjinit.”, shkruan Manjani me ironi në twitter.
Është hedhur sot shorti në Kolegjin Zgjedhor lidhur me ankimimin një ditë më parë të LSI-së, ku relator i çështjes u zgjodh gjykatësi Gjin Gjoni. Pjesë e trupës gjykuese do të jenë gjithashtu: Shkëlqim Mustafa, Tomor Skreli, Sotiraq Lubonja, Lindita Sinanaj. Seanca do të zhvillohet më 20 qershor, ora 11:00.
Lidhur me vonesën e hedhjes së shortit, Gjin Gjoni u shpreh se shkak ishte bërë mungesa e pajisjes, e cila ndodhej në Kuvend.
Shorti i hedhur sot vjen një ditë pas ankimimit të Lëvizjes Socialiste për Integrim, e cila ka ankimuar vendimin e Komisionit Qendror të Zgjedhjeve, duke kundërshtuar haptazi vendimin për anëtarin e tretë në GNV. Me pretendimin se vendimi është në kundërshtim me Kodin Zgjedhor dhe i njëanshëm. (D.D/Shuplaka)
Discussion about this post