Detaje të reja mësohen nga plagosja me armë zjarri në Vaun e Dejës në Shkodër, ku mbeti i plagosur 23-vjeçari Fran Ndrecaj.
Mësohet se e gjithë ngjarja ka ndodhur rreth orës 21:00, në një lokal në Vaun e Dejës, ku pas një konflikti të momentit, Mark Nikolli ka marrë armën dhe ka qëlluar mikun e tij.
Nikolli i cili është banues në Gomsiqe, dyshohet si personi që ka plagosur me armë zjarri në këmbë mikun e tij, 23-vjeçarin Fran Ndrecaj.
Këta të dy kanë qenë të ulur në të njëjtën tavolinë në lokal, mirëpo në një moment ka plasur debati i cili ka degjeneruar në përdorimin e armëve.
Pas plagosjes, Ndrecaj është dërguar menjëherë në Spitalin Rajonal Shkodër, ku ndodhet jashtë rreziku për jetën. Ndërkohë bardhë e blutë janë vënë në kërkim të 26-vjeçarit Mark Nikolli, i cili mësohet se ka qenë dënuar edhe më parë për “Armbajtje pa leje”. Policia ka ngritur pika kontrolli në gjithë zonën për kapjen e tij.
NJOFTIMI I POLICISË:
Vau Dejës- Shkodër.
Informacion paraprak.
Më datë 17.06.2017 rreth orës 21:00 në një lokal në Vaun e Dejës njoftohemi se shtetasi Mark Nikolli, 26 vjeç, banues në Gomsiqe, Vau i Dejës, si pasojë e një konflikti të çastit për motive të dobëta dyshohet se ka plagosur lehtë me armë zjarri në këmbë shtetasin F. N, 23 vjeç, banues në Vaun e Dejës.
Grupi hetimor në kohë rekord ka kryer veprimet në vendngjarje, ku ka sekuestruar prova materiale të vlefshme që do shërbejnë për dokumentimin e plotë të autorësisë së kësaj ngjarjeje.
Nga deklarimet e marra në vendngjarje si dhe nga pamjet filmike të sekuestruara nga Policia, rezulton se të dy këta shtetas janë shokë dhe kanë qënë të ulur në të njëjtën tavolinë në lokal.
Shtetasi F. N, është dërguar menjëherë në Spitalin Rajonal Shkodër dhe është jashtë rreziku për jetën.
Janë ngritur pika kontrolli në gjithë zonën dhe po punohet për kapjen e autorit të kësaj ngjarje.
Theksojmë se autori i kësaj ngjarje është me precedent penal, i dënuar më parë për “Armbajtje pa leje”.
(D.D/Shuplaka)
