Dashamir Shehi shquhet për të thënurit e gjërave troç po ndonjëherë duket se e tepron pak. Këtë herë deklaratën e ka bërë në studion e “Dritares me Rudina Xhunga”.
Sipas tij në administratë duhet të punësohen vetëm personat që kanë mbaruar gjimnazin në kryeqytet.
Shehi thotë se vetëm në këtë mënyrë administrata publike do të arrijë që të shkëputet nga politika.
Po nga ana tjetër të gjithë ne e dimë që një numër shumë i madh i të rinjve që zgjedhin Tiranën për të studiuar vinë nga rrethet. Në një mënyrë a tjetër kjo do të përbënte një diskriminim.
“Çdo vend që krijohet në shtet, nuk është vend pune, pasi hiqet dikush për t’u vënë tjetri, ikën një i PS dhe vjen një i PD. Do ta quaja vend pune nëse ikën një i paaftë dhe vjen një i aftë. Dhe ta mbyllim këtë problemin e militantëve që kërkojnë ende vend pune.
Ai që e ka shkollën le të shkojë, por ai që ka bërë ndonjë universitet dhe ka blerë ndonjë copë letër , nuk ka për të hyrë në punë, të paktën jo te shteti ynë. Madje jo vetëm të lartën në Tiranë, edhe gjimnazin duhet ta ketë bërë në Tiranë.
Kur unë isha në administratë kërkoja jo vetëm universitetin, por pyesja edhe për gjimnazin nëse e kishin bërë në Tiranë. Po të mos e kishe bërë gjimnazin në Tiranë, nuk punoje me mua. Është pak opresive, por i ka shërbyer shtetit shqiptar. Në vitin ’92 kështu e kam bërë për të respektuar shtetin shqiptar”, tha Dashamir Shehi, në Dritare me Rudinën.
(E.K/SHUPLAKA)
