Është parandaluar në kohë vetëvrasja e një adoleshenteje në qytetin e Korçës. Mësohet se 15-vjeçarja që i ishte bashkuar lojës “Balena Blu”, është ndalur në kohë përpara se të kryente vetëvrasje.
Burime të Policisë së Korçës bëjnë me dije dyshimet se e mitura mund të kalonte në vetëvrasje nëse nuk do të ndërhyhej pas informacioneve të marra në rrugë operative.
Dyshohet se të dhënat për këtë lojë, ajo t’i ketë marrë nga një komunikim në rrjetin social “Facebook”. Mësohet se e mitura ndodhet në gjendje të mirë shëndetësore, nën kujdesin e mjekëve dhe prindërve të saj.
Detaje të Policisë së Korçës:
Më datë 29.06.2017, në Sektorin për Hetimin e Krimeve Kompjuterike, në Drejtorinë e Përgjithshme të Policisë së Shtetit, kanë ardhur disa informacione në rrugë operative, se një shtetase 15- vjeçare, banuese në Qarkun e Korçës, duke qenë përdoruese e rrjetit social “Facebook”, mund të kishte marrë disa udhëzime nga një adresë ende e paidentifikuar me përdorues “Balena Blu”. Duke luajtur dhe duke arritur në nivelin e tridhjetë të kësaj loje, dyshohej se e mitura mund të kalonte deri në vetëvrasje.
Si rezultat i bashkëpunimit dhe mirëkoordinimit të veprimeve, midis strukturës të lartpërmendur dhe Drejtorisë Vendore të Policisë Korçë, u bë i mundur identifikimi, lokalizimi i kësaj shtetaseje, si edhe ndërprerja e veprimeve të mëtejshme që mund ta kishin çuar këtë të fundit, deri në vetëvrasje. Sqarojmë se shtetasja e mitur ndodhet në gjendje të mirë shëndetësore nën kujdesin dhe kontrollin e prindërve të saj, duke u asistuar edhe nga një psikologe. Nga ana e Policisë, po punohet për sqarimin e plotë të rrethanave të ngjarjes.
Të dhëna të tjera, nuk mund të jepen pasi rasti i mësipërm është nën hetim. Materialet i kaluan Prokurorisë të Rrethit Gjyqësor Korçë për veprën penale : “Shkaktimi i vetëvrasjes, mbetur në tentative”, parashikuar nga nenet 99 e 22 të Kodit Penal.
(XH.A/SHUPLAKA)
Discussion about this post