Erion Piciri është një nga kandidatët e PD-së që u përjashtua nga gara për të marrë kreun në zgjedhjet e 22 Qershorit.
Po mesa duket Piciri nuk ka qenë fare dakord me vendimin e marrë nga mbledhja e Kryesisë.
Fillimisht ai pakënaqësinë e shprehu në rrjetet sociale, ku hodhi poshtë pretendimin se shkarkimi i tij ishte bërë pasi nuk kishte kartë anëtarësie.
“REFUZIM KANDIDATURE (Bie kandidatura, vazhdon lufta). Grupi i Bashës refuzoi kandidaturën time për kryetar të Partise Demokratike. Argumenti ishte se nuk jam antar partie. E vërteta është se jam antar i PD-se prej vitit 2003.
Vetem ne regjimet autoritar-korruptive u mohohen njerezve te drejtat politike, te drejtat per te kandiduar, per t’i paraqitur antaresise platforma modernizuese te partive dhe vendit ne teresi. E trishte por dhe motivuese per te vazhduar perpjekjet tona, per te kaluar Shqiperine nga kultura e kazermes tek kultura e garave demokratike”, shkruante pas skualifikimit Piciri.
Po mesa duket ish-kandidati nuk e ka lënë me kaq, ai sot ka vendosur që t’i drejtohet me një letër PD-së ku kërkon sqarime në lidhje me skualifikimin e tij.
“Privatisht jam njohur nga disa anëtarë të kryesisë së PD se refuzimi im është bazuar në mungesën e presupozuar të anëtarësisë. Ju bëj me dije se jam anëtar i PD-së prej 14 vitesh, nga data 2 tetor 2003. Në cilësinë e anëtarit, e kam pasur emrin në listë dhe kam votuar për garën për kryetar partie të PD-së në vitin 2013, tek shkolla 11 Janari në kryeqytet.
Anëtarësinë e kam përmendur edhe tek rezumeja bashkëngjitur kërkesës për kryetar të PD-së dhe e gjeni të fotokopjuar bashkëngjitur kësaj kërkese. Megjithëse unë besoj se çdo parti e madhe dhe serioze si PD, i ka të dhënat e anëtarësisë”, thotë Piciri në kërkesën drejtuar PD-së, të cilën e ka publikuar sot syri.net.
“Në rastin tim vërtetimi ka qenë lehtësisht i verifikueshëm se kam pasur bashkëpunim në nivelin më të lartë të lidershipit të partisë. Vetë kryetari i partisë ka pasur një fotokopje të dëshmisë time të anëtarësisë të dërguar me email, më datë 24 prill 2015.
Në të njëjtën kohë aktiviteti im ka qenë i njohur brenda partisë. Në katër vitet e fundit jam përfshirë në dy fushatat parlamentare të PD-së: në Berat (2013) si këshilltar fushate dhe në Tiranë (2017) si pjesë e listës për deputet. Në këto katër vitet e fundit që kam jetuar në Shqipëri, kam këshilluar në periudha të ndryshme kryetarin e Partisë Demokratike dhe kam trajnuar tek selia e partisë (nëntor 2014- mars 2015) mbi 300 aktivistë partie nga i gjithë vendi për çështjet e lidershipit politik dhe fushatave elektorale”, ka vijuar më tej ai.
(E.K/SHUPLAKA)
Discussion about this post