Zhdukja e biznesmenit dhe ndihmësit të tij, flasin familjarët: Nuk kemi konflikt me askënd

Fabian Jaho, djali i biznesmenit të zhdukur nga Vlora dhe babai i Ariseld Mazes kanë folur për “Report TV” për zhdukjen e familjarëve të tyre. Ata kanë deklaruar se nuk kanë konflikt me askënd dhe duan të dinë nëse janë gjallë familjarët e tyre

Djali i biznesmenit, Fabian Jaho, thotë se babai doli në det për të provuar skafin ndhe s’u kthye. Ai  deklaron se ishte në Itali kur kishte marrë vesh lajmin dhe thotë se denoncimin në polici e ka bërë vëllai i tij në datën 5 korrik.

“Unë kam qenë në Itali, më ka marrë mamaja në telefon dhe më tha mamaja që babai ka dalë me skaf nga Durrësi dhe nuk është kthyer më. Vëllai ka bërë denoncim në polici dy ditë pas zhdukjes së babait.

Ai ka qenë për të provuar një skaf që e kishte të tijën. E ka nxjerrë nga servisi dhe kanë lënë hapur dy tapat që nxjerr ujin mjeti.

Dhe kishte ikur për të nxjerrë ujin. Ai natën e fundit që është zhdukur ka thënë sillni karrelin se skafi po merr ujë dhe nuk po e nxjerr ujin.

Ai është i apasionuar pas detit dhe të humbë njeri në mes të korrikut anës detit nuk është normale” tha djali i biznesmenit.

Ndërsa i ati i Ariseld Mazes, ndihmësi i zhdukur së bashku me biznesmenin thotë se do të dijë vetëm nëse janë gjallë, ai gjithashtu thotë se nuk kanë pasur konflikte me askënd.

Biznesmeni vlonjat Adriano Jaho 52 vjeç dhe ndihmësit të tij Ariseld Maze 28 vjeç, të cilët kishin dalë në bregdetin e Durrësit për të provuar skafin në det dhe kanë humbur kontaktet prej datës 4 korrik.

(B.H/Shuplaka)