Katër ditë pas vdekjes së Enea Ferkos, i cili vrau veten pas ndarjes nga e dashura, nëna e tij tregon historinë e dashurisë së të birit të humbur.
Nëna e quajtur Aida tregon në një intervistë për gazetën “Panorama”, se si i biri pas një fëmijërie të vështirë, më në fund kishte përjetuar gëzim pas njohjes me vajzën nga Peqini.
Ndër të tjera, Aida tregon se enea e kishte marrë njëherë të dashurën nga shtëpia e saj dhe për këtë kishte përfunduar në komisariat. Kjo sepse prindërit kishin denoncuar zhdukjen e vajzës së tyre.
Për më tepër, Aida tregon se si vajzën nga Peqini vendosën që ta merrnin për nuse pikërisht në Komisariat.
PJESË NGA INTERVISTA
Eneo e bëri gjithë këtë për një vajzë. Cila ishte ajo dhe çfarë ishte për Eneon?
Ajo ishte një 17-vjeçare nga Peqini, me të cilën u njoh në Facebook në muajin janar. Duke qenë se fëmijët e mi janë rritur me shumë halle për shkak të problemeve që ne prindërit e tyre kemi pasur sa ishim bashkë e pastaj ndarja jonë, djemtë ishin të palumtur. Ishte rritur mes dhimbjes. Dhe unë vura re që gjatë kohës që fliste me të, djali po çelej. Ishte i lumtur, gëzonte. Dhe kur më tha që fliste me një vajzë, nuk i thashë asgjë. U gëzova që ajo po ma bënte të lumtur djalin.
Sa kohë vazhduan kështu në komunikim dhe kur u takuan?
U njohën në janar dhe më 3 mars kishin lënë takim. Do të pinin kafe. Unë nuk dija gjë. Kishte ikur ta takonte. Vetëm kur erdhi më tregoi që e kishte takuar, ndërsa djali i vogël më tha që ishte bërë gjithë baltë nga trupi djali, gjithë rrobat. Nuk i thashë asgjë, por dyshova se mund ta kenë rrahur njerëzit e saj. S’më tregoi asgjë dhe nuk e pyeta kurrë. Por rrobat ishin gjithë baltë.
Çfarë ndodhi më tej me vajzën? E njohe ti? U takua djali prapë me të?
Jo. Pas një jave djali kishte ikur prapë, pa më thënë, dhe kishte shkuar dhe e kishte marrë vajzën. S’e di se si vendosi ta marrë, por kishin ikur të dy atë natë. Prita të vinte në shtëpi, por nuk erdhi dhe telefonin e kishte mbyllur.
Të nesërmen prisja me gjak të ngrirë ndonjë lajm prej tij. Kisha frikë ngaqë dyshoja te rrahja para një jave. Kur prisja telefonatë nga djali, më mori policia e Fierit dhe më tha të shkoja në komisariat. Vajta atje e mora vesh që djali e kishte marrë vajzën dhe prindërit e saj e kishin denoncuar në Peqin, ngaqë ajo ishte e mitur. Unë s’dija asgjë.
Po djali a erdhi? Si u lidhe me të?
Erdhën ata të dy. Vajza kishte marrë rrobat me vete dhe para për të cilat tha se ia kishte dhënë e ëma. Megjithatë, shkuam pas dy ditësh në polici edhe prindërit e saj dhe ne dhe deklaruam që vajza iku vetë e ne do ta mbanim për nuse. U bë fakt i kryer ky muhabet. Aty në polici u vendos. (D.D/Shuplaka)
