Deputeti socialist dëshmon në seancë: Jam takuar me Shullazin, çfarë më kërkoi

Mjaft personazhe të njohur të botës së politikës janë përmendur në ccështjen gjyqësore të Shullazit.

Kështu pas Saimir Tahirit dhe Lindita Nikollës edhe një politikan tjetër rezulton i ‘përfshirë’ në çështjen e Emiljano Shullazit.

Deputeti socialist Jurgis Çyrbja ka dëshmuar në seancën e sotme ndaj Shullazit dhe grupit të tij që akuzohen për gjobëvënie, duke folur për lidhjet e tij edhe me biznesmenin Ylvi Beqja.

Sipas Çyrbjas, biznesmeni Beqja i kishte kërkuar të takonte Shullazin dhe regjistrimin e hotel “Vollgës”.

 “Ylvi Beqaj më ka kërkuar regjistrimin e hotel ‘Vollgës’. Beqja më kërkoi të takoja ish-pronarin, Shullazi. Jam takuar në një lokal në Shijak afër shtëpisë sime”, ka thënë deputeti i PS, duke rrëfyer edhe bisëdën me Emiljano Shullazin.

“Shullazit i kam thënë se do të zbatoj ligjin. Ai më pyeti nëse do ta regjistroja pronën. Bëra regjistrimin dhe kufizimin e pronës. Kam pasur konflikte,po jo me personat e pandehur”, tha Çyrbja.

Shullazi akuzohet si kreu i një grupi kriminal për gjobëvënie e mbi të rendojnë 7 akuza.
Sipas Prokurorisë, Shullazi ka gjobitur tre biznesmenët Ylvi Beqja, Jani Zaka dhe Adriatik Këçuku si dhe ka kërcënuar për t’u tërhequr nga gara kandidatin për rektor Mynyr Koni si dhe ka kanosur rektorin Dhori Kule.

Përveç Emiljano Shullazit nën gjykim do të jenë edhe shoku i tij Gilmando Dani, nipi i tij Endrit Zela si dhe Blerim Shullazi e Endrit Qyqa.

(E.K/SHUPLAKA)