Tragjedia në Ksamil, flet dëshmitari: Vajza ruse u godit nga një motor uji

Detaje të reja kanë dalë nga ngjarja e rëndë që ndodhi sot në Ksamil, ku një vajzë e re u nxor e vdekur nga deti.

Sipas një dëshmitari, i cili shkruan për “JOQ”, turistja ruse nuk ka rënë nga shkëmbi siç është raportuar paraprakisht, por është goditur nga një motor uji, i cili ka qenë brenda zonës së ndaluar për këto mjete. 

Dëshmitari shkruan se drejtuesi i motorit të ujit, pasi ka çarë vajzën dhe ka parë që në ujë kanë nisur shenjat e gjakut është larguar me shpejtësi. Sipas tij, një person tjetër me një varkë të thjeshtë ka nxjerrë në breg trupin e viktimës.

 “Në tragjedinë që ndodhi në Tre ishujt e Ksamilit vajza është goditur me jetsky brenda kufirit të ishullit dhe personi me motorin e ujit është larguar sapo ka parë njollat e gjakut. Policia po e fsheh faktin që ka qenë një jetsky në ujë. Një person që rri tek varkat që marrim çdo ditë e nxori viktimën nga uji. Ajo ishte e goditur dhe kishte mbi 20 minuta nga momenti që e kishte parë ky. Ai mori në moment policinë dhe ata vonuan gati gjysmë ore, ndërkohë që jetsky u fut brenda kufirit që nuk lejohet dhe që është vetëm për pushuesit që notojnë. Ai që e ka vrarë është zhdukur dhe policia asgjë s’po bën për ta kapur. Theksoj që nga deti vajzën e ka nxjerrë ky që transportonte njerëz për në ishull me një barkë të vogël. Ajo kishte çatje në trup dhe goditje në kokë”, shkruan dëshmitari.

Ndër të tjera dëshmitari shkruan se në Ksamil situate është me të vërtetë e frikshme. Kjo për shkak as 200 metra larg bregut të detit lundrojnë me shpejtësi motorë uji, të cilët rrezikojnë seriozisht jetën e pushuesve. (D.D/Shuplaka)