Pas vendimit të Gjykatës së Dubrovnikut në Kroaci për ektradimin e Ballist Morinës në Serbi për shkak të ngritjes së dronit në Beograd gjatë ndeshjes Serbi-Shqipëri, është zbuluar dhe dokumenti I palës serbe drejtuar asaj kroate. Opinion.al ka siguruar kërkesën e palës serbe drejtuar asaj kroate për ekstradimin e Ismail Morinës.
Siç shikohet edhe në dokumentin prej 7 faqe të siguruar nga Opinion.al, arsyeja përse drejtësia serbe kërkon ekstradimin e Ismail Morinës ka të bëjë me ngjarjen e nëntorit 2014, ku gjatë ndeshjes Serbi-Shqipëri e vlefshme për Eliminatoret e Kampionatit Europian Francë 2016, në fillimin e pjesës së dytë në stadium u shfaq një dron me një baner me mbishkrimin “Autochtonus”. Autorësi e cila më pas u mor përsipër nga shtetasi i vetëidentifikuar si Ismail “Ballist” Morina.
Lëshimi i këtij droni në stadiumin e Beogradit solli trazira në stadium dhe si pasojë ndërprerjen e ndeshjes. Ismail Morina tashmë ndodhet prej më shumë se një muaji i ndaluar nga shteti kroat i cili ka vendosur në shkallën e parë të drejtësisë të pranojë ekstradimin e tij për interes të palës serbe. Ndërkohë që menjëherë pas këtij vendimi kanë qenë të forta reagime brenda dhe jashtë vendit, ku sot është paralajmëruar edhe një protestë masive në orën 19.00 përpara Kryeministrisë me qëllim që organet ligjore të vihen në lëvizje për të të bërë të mundur mosekstradimin e Ballist Morinës në Serbi. (B.H/Shuplaka)
Discussion about this post