Gazetari Artan Hoxha ka rrëfyer sot një bisedë që ai ka zhvilluar me ministrin e Brendshëm, Dritan Demiraj, pasi ky i fundit ka marrë detyrën.
I ftuar në emisionin “Kjo Javë” të gazetares Nisida tufa, Hoxha shprehet se ministri teknik Dritan Demiraj, i cili u vendos në këtë post pas marrëveshjes së 18 majit, u angazhua fort në luftën ndaj trafikut të lëndëve narkotike.
“Unë kam patur një kontakt me të sapo ka marrë detyrën. Ka qenë shumë i interesuar për të goditur kultivimin e lëndëve narkotike. Më ka bërë të qartë se synonte të kishte rezultat dhe të ndikonte në luftën kundër narko-trafikut. I kam thënë për kaq kohë sa je ti dhe për detyrën specifike, sepse ishin përpara zgjedhjet e 25 qershorit, duhet të kesh shans që të kapet ndonjë sasi e madhe, e cila do të mund të shërbejë sidomos si mesazh që i shkon narko-trafikanteve se nuk do tolerohen. Në fakt u kap sasia 15 ton e Vlorës, dhe ai ia doli pasi e mbështeti aksionin e Policisë së Shtetit, dhe kjo është një gjë shumë e mirë. Kjo ndodhi pavarësisht bindjeve politike dhe programeve që kanë.
Por duhet të kemi parasysh që ministri i Brendshëm është kryesisht në nivel politik, ndërsa ata që e ndjekin fenomenin në terren është Policia e Shtetit dhe Prokuroria, nëpërmjet përgjimit që bën të telefonatave. Kam vënë re se kohët e fundit është rritur kapja e sasive të drogave të forta, heroinë dhe kokainë, kjo është një gjë e mirë, por përmasat e këtij trafiku janë të mëdha. Shqipëria është një nga kanalet e trafikut të heroinës afgane drejt kontinentit europian”, u shpreh gazetari Hoxha. (D.D/Shuplaka)
Discussion about this post