Presidenti i Skënderbeut, Ardian Takaj, prêt një ndeshje të madhe në “Elbasan Arena” nga ekipi i tij i Skënderbeut kundër Mllada Boleslav.
“Së pari, më duhet të pranoj se ka qenë një ndeshje e vështirë, pasi në këtë fazë ku jemi tani nuk ka kundërshtarë të lehtë. Sigurisht që humbja mbetet e tillë, por goli i shënuar në fushë kundërshtare na jep shumë shpresë. Të gjithë e dimë se sa peshon një gol në transfertë dhe për këtë duhet të bëjmë maksimumin që ta shfrytëzojmë në të mirën tonë. Jam i bindur që ekipi do të bëjë një ndeshje të madhe në Elbasan”, tha ai.
Nga ana tjetër ai shpreh keqardhje që UEFA e penalizoi Skënderbeun duke e detyruar të luajë jashtë fushës së vet për shkak se e cilësoi të pa përshtatshëm murin rrethues të stadiumit.
“Të them të drejtën, fusha jonë është e përshtatshme për të luajtur edhe këtë tur në Ligën e Europës. Gjithsesi, atë e vendos UEFA dhe jo ne si klub. Sipas UEFA-s, janë një sërë kushtesh që nuk përmbushen, duke filluar nga muri rrethues i stadiumit, dhomat e brendshme të impiantit, por edhe salla e konferencave për shtyp”, tha Takaj.
Në një prononcim për “Panorama Sport” ai tha se prêt tifozë nga e gjithë Shqipëria në Elbasan në mbështetje të Skënderbeut, ndërsa kujtoi se nga Korça do të ketë autobuzë falas për tifozët.
“Sigurisht që nuk do të ishte e njëjta gjë nëse do të luanim në Korçë. Të gjithë e pamë atmosferën e krijuar me Kairatin dhe e dimë se sa ndihmesë janë tifozët për ekipin. Gjithsesi, besoj që edhe në Elbasan do të kemi mbështetje të madhe. Tifozët e Skënderbeut jam i bindur që do të ndihmojnë ekipin siç kanë bërë çdo herë, madje tani edhe më shumë. Por, pres të ketë tifozë nga të gjitha qytetet”, tha ai.
Skënderbeu do të luajë përballë Mllada Boleslav më 3 gusht në Elbasan, ndeshje e vlefshme për Europa League. Përballja e parë ka përfunduar 2-1 në favor të Mllada Boleslav. (B.H/Shuplaka)
Discussion about this post