Fakte dhe të dhëna për rolin e organizatave kriminale në bashkëpunim me qeverinë për blerjen dhe manipulimin e votës së 25 Qershorit. Ky ka qenë fokusi i darkës së kreut të PD-së dje.
Lulzim Basha pati mbrëmë një darkë pune me kongresmenët Devin Nunes, kryetar i Komisionit për Inteligjencën në Kongresin amerikan, dhe Rick Crawford, anëtar i këtij komisioni.
Biseda u përqëndrua te situata në Shqipëri dhe rajon dhe bashkëpunimi strategjik me SHBA për t’u përballur me kërcënimet e krimit të organizuar, trafikut të drogës dhe korrupsionit.
Mësohet se kreu i opozitës i njohu kongresmenët amerikanë me fakte dhe të dhëna për rolin e organizatave kriminale në bashkëpunim me qeverinë për blerjen dhe manipulimin e votës së 25 Qershorit.
Bashkëbiseduesit ndanë shqetësimin për shumë prej problemeve të evidentuara në zgjedhje dhe u shprehen në mbështetje të një reforme të thellë zgjedhore dhe zbatimit të reformës në drejtësi. Po ashtu, bëhet e ditur se ata shprehën shqetësimin për rritjen galopante të kultivimit e trafikimit të drogës në Shqipëri. Siç mësohet, Basha i siguroi kongresmenët për qendrimin e palëkundur të PD-së, në luftën kundër korrupsionit, krimit të organizuar dhe drogës, në shërbim të demokracisë, sundimit të ligjit dhe të ardhmes europiane.
Siç shihet dhe nga fotoja, në krah të Bashës qëndron ministri i Punëve të Brendshme Dritan Demiraj. Ministri teknik deklaroi ditë më parë se ka gati 124 emra që janë të përfshirë në biznesin e drogës. /(V.G-Shuplaka)
