Bejtja ”skaner” PD-së: Duket sikur Petrit Vasili është kryetar, Lulzim Basha editor i sociales te ”Mapo”

Andi Bejtja është i një mendjeje me analistin Çim Peka, lidhur me heshtjen e Partisë Demokratike këto kohë.

”Kush është lideri i PD-së!?

Sapo lexova një shqetësim të drejtë të Çim Pekës në lidhje me heshtjen e Partisë Demokratike, Peka thotë për ditën e sotme, por po ta vëmë re me kujdes jo vetëm sot.”, mendon Bejtja.

Për të ka vetëm një përfundim të qartë: duket sikur Petrit Vasili i LSI-së është kryetari i PD-së, ndërsa kryetari aktual Lulzim Basha editor i sociales në gazetën ”Mapo” të Henri Çilit.

”Që pas fitores së Edi Ramës në këto zgjedhje i vetëm, opozitë të përditshme po bën vetëm Petrit Vasili i LSI-së…Duket sikur Vasili është kryetari i Partisë Demokratike, ndërsa Lulezim Basha editor i sociales në Gazeten ”Mapo”…”, shtjellon më tej mendimin e tij analisti Bejtja.

Disa ditë më parë mes PD-së dhe LSI-së pati përplasje të forta pas miratimit të rritjes së çmimit të ujit në Këshillin Bashkiak të Tiranës. Ndërsa po gjatë fushatës elektorale targeti i Lulzim Bashës, ndryshe nga protesta 3-mujore në çadrën para Kryeministrisë nuk qe Edi Rama dhe lufta ndaj PS-së, por LSI-ja.

PD-ja humbi thellë zgjedhjet, ndërsa LSI-ja fitoi më shumë mandate deputetësh se zgjedhjet e kaluara.

Në këtë situatë, kur PD-ja ende nuk ka vendosur, të paktën shprehur fuqishëm publikisht se cila do jetë sjellja e saj me Edi Ramën, do ta kundërshtojë apo jo, Bejtja me të drejtë mendon që kryeministrit Edi Rama që do të formojë qeverinë në shtator, i ka ardhur krejtësisht në dorë një situatë komode.

”Ndaj dhe kryeministrit nuk i mbetet gjë tjetër, veç të bëjë këtë që ka bërë kto ditë: editorin e ”National Geographic”, duke përshëndetur shqiptarët në ”Facebook” me foto nga bukuritë e Shqipërisë…”, përfundon Bejtja.

A ka mbetur diskutimi te demokratët ende të pakënaqësia e listës së deputetëve dhe humbja e zgjedhjeve, apo tashmë po bëhen gati të ndajnë njëherë e mirë filozofinë dhe rrugën që do ndjekin në këto 4 vjet opozitë?! Do merren vetëm me LSI-në, që si ata është në opozitë apo do luftojnë fort kundër Edi Ramës që sipas gjasave do përqëndrojë në duart e tij çdo ditë që kalon gjithnjë e më shumë pushtet?!(V.G/SHUPLAKA)