Ngjarja e rëndë e një dite më parë në Foxhia të Italisë, kur mbeti i vrarë bosi i mafias italiane dhe dy persona të tjerë, ka vënë në lëvizje autoritetet e shtetit fqinj.
Edhe pse deri më tani, kjo formë krimi ka qenë konsideruar deri vonë si një kriminalitet i mafias së tipit B, duket se situate ka ndryshuar.
Kjo pas intervistës së Prokurorit të Përgjithshëm të Antimafias Italiane, Franco Roberti, për Rai Uno. Ky i fundit ka hedhur dyshime të forta për një luftë të egër mafioze ku sipas tij një nga shkaqet është edhe droga shqiptare.
Gjatë intervistës, Roberti tha se përplasjet mes klaneve në Pulia, vijojnë prej 30 vjetësh me një bilanc prej 300 vrasjesh, prej të cilave 80% kanë mbetur pa u zbuluar. Por shkaku i zgjimit të kësaj lufte të egër, duket se vjen nga Shqipëria. Bëhet fjalë për sasitë e mëdha të kanabisit, që mbërrijnë në brigjet italiane nga vendi ynë.
“Tani përplasja ka shpërthyer rreth trafikut të drogës, veçanërisht të drogave të lehta që vijnë nga Shqipëria. Një biznes i madh që rrit orekset e klaneve dhe që mbi të gjitha nis nga Foggia, shkon përtej bregdetit Adriatik deri në zemër të Europës. Mafia foxhiane kohët e fundit ka forcuar strukturat e saj duke u bërë kështu një pjesë e Kamoras napolitane. Ne kemi rritur aftësitë investigative dhe do të vijojmë ta bëjmë këtë”, është shprehur Franco Roberti.
Ndër të tjera, shefi i antimafias italiane ka kujtuar edhe vizitën e fundit në Shqipëri, për të cilën shprehet se ka një kulturë të vakët të ligjshmërisë.
“Ne duhet të bëjmë më shumë për të zgjeruar bashkëpunimin ndërkombëtar për të frenuar lumenjtë e drogës që vijnë nga Shqipëria që është bërë tashmë një motiv sherri midis bandave mafioze në zonën e Pulias. Ne shkuam në Shqipëri gjatë muajve të fundit për të kërkuar bashkëpunim, jemi takura në Romë me ministrin e Brendshëm shqiptar i cili ka premtuar bashkëpunim më të madh. Duhet të fitojmë dhe për ta bërë këtë duhet të krijojmë një kulturë ligjshmërie që në atë vend është ende shumë e vakët. Kryeprokurori në Bari, Giuseppe Volpe, bën mirë të bëjnë thirrje për bashkëpunim më të madh nga qytetarët”, tha shefi i antimafias. (D.D/Shuplaka)
Discussion about this post