Zjarri në aksin Levan-Fier, 50 punonjës të FA-ve në aksion për të shuar flakët

Një zjarr i përmasave të mëdha është shënuar sot në aksin rrugor Levan-Fier, pranë vendit të quajtur Qafa e Koshovicës. 

Mësohet se flakët e zjarrit kanë përfshirë disa hektarë me ullinj që ndodhen fare pranë rrugës, duke bllokuar kështu edhe trafikun rrugor.

Udhëtarët kanë mbetur të bllokuar për shkak se bëhet fjalë për një zjarr të përmasave të mëdha. Fillimisht u raportua se zjarrfikësit nuk kishin mbërritur, mirëpo pak orë më vonë në vendngjarje mbërritën plot 50 punonjës të Forcave të Armatosura, të cilët janë angazhuar për të shuar flakët.

Rëndimi i trafikut është një nga arsyet që ka sjellë vonesën për mbërritjen e mjeteve zjarrfikëse. Mirëpo terreni i vështirë e ka bërë të pamundur shuarjen e flakëve. (D.D/Shuplaka)