Për helmimin e dasmorëve në Shijak kanë dalë analizat toksikologjike dhe kanë rezultuar negative.Kryeinspektoria e Inspektoriatit Shëndetësor, Xhaneta Saliu tha se fakti që dasmorët janë ndjerë keq, nuk ka të bëjë me helmim të ushqimit. Ajo theksoi se Inspektoriati Shëndetësor dhe AKU-ja kanë kryer analizat toksikologjike dhe ka rezultuar që ato të dalin negative. Në këto kushte, pas bllokimit disaditorë, pritet që restoranti të rifilloj aktivitetin e tij.
Por ka reaguar edhe Durim Kapo, pronari i lokalit i cili deklaron se ka mbetur i tronditur nga fakti që dasmorët mund të kishin pësuar helmim ushqimi.
“E para e punës ne na ra si bombë. Lajmin e morëm vesh pas 24 orësh. Për mua ka qenë e pabesueshme, pasi ne punojmë të gjithë si familje. Është një biznes familjar. Kur e kemi parë në televizor ishte e pabesueshme, madje kur erdhi policia tek dera u tronditëm. Puna jonë nuk mund të jetë se: ‘Unë nuk kam faj’. Dje mora përgjigjen e analizave. Ishte negative. Unë fajin ia kam vënë kondicionerëve. Ne atë natë bëmë një gabim, i kishim lënë shumë ulët. Madje e kam diskutuar edhe me kryekamerierin tim, pasi i thash se mund të kemi ‘një problem’. Më shkau situata nga duart, faji është i imi. Kjo ndodh kudo, ndodh në gjithë lokalet. Sot unë kam të drejtë të flas, se u bë gjithë kjo zhurmë”, tha Durim Kapo për ‘News24’.
Nga kjo ngjarje ngelën të helmuar 13 dasmorë dhe u shtruan në spitalin e Durrësit me diarre, të vjella dhe temperaturë të lartë. (J.V/Shuplaka)
Discussion about this post