Duket se bllokada politike në Kosovë do të marrë shpejt fund. Koalicioni PAN ka arritur marrëveshje me kreun e AKR’së, Behgjet Pacollin, për formimin e Qeverisë së Kosovës. Fillimisht, me këtë marrëveshje arrihet zhbllokimi i Kuvendit duke e votuar Kryeparlamentarin, e më pas kalohet në votimin e Qeverisë. Sipas të gjitha gjasave, seanca e radhës ku do të implementohet kjo marrëveshje do të mbahet në fillim të shtatorit, rapoton Express.
Koalicioni PAN dhe Aleanca për Kosovën e re e Behgjet Pacollit kanë rënë dakord për krijimin e institucioneve të reja.
Pacolli ka pranuar të bëhet pjesë e qeverisë së re e cila pritet të drejtohet nga Ramush Haradinaj.
Me sa duket negociatat që janë zhvilluar gjatë fundjavës që shkoi, kanë qenë vendimtare për këtë marrëveshje. Javën e kaluar Kuvendi i Kosovës nuk arriti të zhbllokohet pasi PAN ende nuk i kishte votat për Kryeparlamentarin. Kjo nxiti debate të ashpëra dhe përplasje sidomos ndaj Vetëvendosjes dhe Partisë Demokratike të Kosovës.
Kreu i PDK’së Kadri Veseli në replikat e tij me Albin Kurtin në Kuvend, tha se do të hiqte dorë nga posti i Kryeparlamentarit nëse Kurti arrin të sigurojë 61 vota – aq sa duhen për zgjedhjen e kryeparlamentarit dhe formimin e institucioneve.
Zyrtarë të PDK’së dhe të partive tjera në Parlamentin e Kosovës kanë thënë se presin që Kuvendi të mbajë seancën e re gjatë javës së parë të muajit shtator. (B.H/Shuplaka)
Discussion about this post