Dedikimi prekës i Mimoza Hafizit pas vrasjes së gjyqtares: Lamtumirë kushërira ime trime!

Pas vrasjes së gjyqtares, Fildes Hafizi nga ish-bashkëshorti i saj ditën e sotme në kryeqytet ka reaguar Mimoza Hafizi.

Ajo shkruan se Fildes ishte vajzë e rrallë, dhe shpreh dhimbjen që s’mund të shkoj në ceremoninë mortore sepse gjendet larg.

“Fildes Hafizin e vranë sot pabesisht. Ishte vajzë e rrallë. E donte shumë jetën, adhuronte fëmijët e prindërit, admironte profesionin, respektonte dijen, i përkushtohej karierës, përbuzte injorancën, përçmonte apatinë, sfidonte stërmundimin. U diplomua juriste, magjistrate, gjykatëse duke rritur dy fëmijë. E thurri me mund ëndrrën e vet. Që sot ia prenë egërsisht.

Jam shumë larg e s’mund të shkoj t’i hedh një grusht dhé lamtumire. Me dhimbjen për vitet e pajetuara, me brengën e një vdekjeje që nuk e shmangëm dot, me jehonën e klithmave të saj për ndihmë, me revoltën ndaj sistemit që kemi ngritur.

Por e di se buzëqeshja e saj e bukur do çajë murin e zi të vdekjes për t’iu bërë dritë dy prindërve të mjerë e dy fëmijëve të dashur. Se iu duhet, që t’ia shohin kuptimin jetës edhe pa sytë e Desit.
Lamtumirë kushërira ime trime!”Shkruan Hafizi.

q