Pas debatit në Akademinë e Shkencave, ku një rol të madh në evidentimin e problemeve pati dhe akademiku Artan Fuga, mbetet mister fati i këtij institucioni.
Kjo pasi kryeministri Rama i quajti farsë zgjedhjet e djeshme dhe tha se qeveria nuk do të japë fonde për ta.
Mirëpo për gazetën “Mapo” të Henri Çilit modeli që propozon akademiku Fuga është një model sovjetik. Ky ka qenë dhe titulli i editorialit të gazetës shkruar nga Ervis Iljazaj.
Edhe pse e njeh meritën e Fugës për ngritjen e problemeve Iljazaj shkruan se edhe reagimi i kryeministrit mbështet modelin sovjektik të drejtimit të arsimit.
“Padyshim, që një meritë të veçantë për debatin e Akademisë së Shkencave , ka dhe akademiku Artan Fuga, me debatet e tij të përditshme. Kjo është një meritë që i duhet dhënë, por modeli që profesor Fuga propozon për shkencën duke lexuar propozimet e tij për të, është po i njëjti .
Është një model i zhvillimit shkencor tipik Sovjetik. Një model i bazuar te monopoli shtetëror për shkencën, ku shkencëtarët kanë varësi të përhershme te rroga e shtetit dhe, në këtë mënyrë bëhen gjithmonë të kontrollueshëm prej tij. Postimi i Kryeministrit përforcon këtë ide, duke i kërcënuar me prerje totale fondesh. Dihet që politika, aq më tepër kjo e jona e përdor edhe shkencën në funksion të populizmit të përherësh që i duhet.
Profesor Fuga ka të drejtë kur thotë se Akademia e Shkencave është kthyer në një institucion që vegjeton dhe harxhon para nga taksa paguesit shqiptarë pas asnjë vlerë, pasi produkti shkencor që ajo duhet të prodhojë mungon. Mirëpo, zgjidhja nuk është të largohet disa njerëz dhe të vijnë disa të tjerë.
Akademia e Shkencës pasi u reformua në vitin 2008 dhe iu hoqën të gjitha institutet që ishin në varësi të saj, tani ka ngelur një grup akademikësh pa asnjë strukturë mbështetëse”, thuhet ndër të tjera në shkrimin e ‘’Mapos”.
Mirëpo Profesor Fuga në një përgjigje të shpejtë i quan ‘’kakarisje” qëndrimet e Mapos dhe thotë se pak më vonë do të ketë dhe një qëndrim më të detajuar të tij.
“Debati mes shkencëtarëve për fatet e reformimit të Akademisë të Shkencave dhe “kakarisjet” editoriale të mapos në periferi”, shkruan Fuga.
(E.K/SHUPLAKA)
Discussion about this post