Ish-ministrja e Integrimit Klajda Gjosha, ka reaguar lidhur me protestën e banorëve të Shkozës të cilët u ngritën kundër prishjes së shtëpive në zonën ku po ndërtohet Unaza e Madhe në kryeqytet.
Gjosha shprehet se ishte e vështirë t’i shikojë sot banorët të cilëve po u prisheshin shtëpitë, ndërsa u bën thirrje autoriteteve ta ndalin këtë veprim.
“Ishte e vështirë të shikoje sot banorët e Shkozës që po ju prisheshin shtëpitë e tyre. Ishte e veshtirë të dëgjoje fjalët drithëruese të një fëmije të pafajshëm, i cili mes lotësh shpresonte se dikush do ta degjonte.
Janë këto pasojat e para të votës së 25 Qershorit, votë kjo që u mor mes shumë mashtrimesh por njëra prej tyre ishte pikërisht se banorëve ju premtua se nuk do t’ia prishnin shtëpitë që ishin gjaku dhe djersa e tyre! Por 25 Qershori kaloi shumë shpejt dhe meqënëse vota e tyre e kreu detyrën më së miri, ajo cka mbetet është vetëm keqtrajtimi, ushtrimi i pushtetit në një mënyrë të turpshme dhe mosmbajtja e fjalës!
I bëj thirrje autoriteteve që të ndalin prishjet dhe të arrihet sa më parë një marrëveshje mes banorëve që janë njerëz të thjeshtë dhe të varfër dhe institucioneve përkatëse. Cdo iniciativë që lehtëson sado pak dhimbjen e tyre sot ka vlerë, kuptohet nëse ka mbetur një fije arsye në këtë shtet të pashpirt!”, shprehet Gjosha.
Kujtojmë se vetëm pak ditë më parë Erion Veliaj inaguroi unazën e re të Tiranës. Ndërsa sot dhjetëra qytetarë kanë protestuar kundër prishjes së shtëpive në zonën e Shkozës në kryeqytet për shkak të zgjerimit të rrugës, si pjesë e planit urbanistik të Tiranës.
Protestuesit kërkojnë një marrëveshje me Bashkinë, pasi kjo e fundit do ndërtojë një rrugë të re, por duke prekur 153 shtëpi. Ndërkohë pamje mjaft trishtuese u paraqitën sot gjatë protestës, kur policia nuk po kursente askënd nga protestuesit edhe pse një fëmijë i vogël po ulërinte: Mos ma merrni babin!
(D.D/Shuplaka)
Discussion about this post